鬼孫出世!

我個鬼佬老闆第二次做爺爺啦，開心得佢吖！

星期二早上，新抱仔已經穿羊水(早咗兩個幾星期)，呀仔即刻陪佢入院。做爺爺既就繼續返工，仲懶醒咁話：「第一胎邊有咁快生得出吖，我下晝先打去check下佢生得未啦。」

三點幾，我仲俾佢同個回港度假既Summer仔一齊去飲咖啡，飲飲下又俾呀仔急call：「就黎生咯喎！你快d黎啦。」

即刻衝上公司執埋d野走人，期間遠在澳洲既嫲嫲已經收到風，發追魂call：「你有冇搞錯呀？仲未去醫院呀！」

「去緊啦，啱啱準備出門口咯。」

乜唔係呀仔先係主角咩，呢個二打六都係去掙下場既唧！點都好啦，搵個人陪下呀仔，有傾有講d時間易打發d既。

六點幾，傳短訊問佢有冇消息，仲未生得，睇怕仲要最少一粒鐘。
終於差唔多八點先出到世！

呢兩幅相就係佢出世半句鐘個樣啦，都有成3.5公斤重架。

呢對腳印, 睇怕都算係BB既第一個簽名啦卦?

其實個個BB出世都係咁上下樣架啦, 不過外藉BB既輪廓點都會好少少既.

仲諗住佢玩下手做到初一搶閘B添! 今次冇行啦!