近視VS老花

近視VS老花

如果你曾經試過近視，或者視力越來越模糊（係未配到眼鏡前通常都會有一段日子你捱），你未必會記得呢個世界既真實情況係點，又或者你根本未曾清清楚楚見過呢個世界。

好似我咁，經歷過視力模糊既階段十多年，講出黎都冇人信，我由細細個開始已經知道自己睇野係有兩個焦點架啦。只係得果幾歲人仔，唔識得話講俾大人知，亦都唔知咁係唔正常既。自我有意識起計，我既左眼一向都係濛查查既，所以某程度上係單靠右眼去睇野既。若然偏重使用一只眼，好快呢只眼亦都會有問題，於是近視就係咁黎啦。

又咁啱，當時d大人以為我貪靚先會要求配返副眼鏡，於是就專登整副好核突既我歎。我好記得連埋鏡同框都係廿八蚊。如果一個青少年配唔到一副舒適又美觀既眼鏡，你估佢會唔會成日戴住吖拿？就係咁，我於是就過住「要睇野先戴」既生涯啦。

一路忍受呢副一戴就俾人笑既眼鏡幾年，到畢業之後先自己走去配咗一副稍為好少少既。但始終都係唔習慣戴眼鏡行路，地面同樓梯都好似彎晒咁，好冇安全感，又會暈陀陀。如是者，都配過好幾副眼鏡，可惜冇副舒服。

出黎做野之後，有一晚，公司d呀哥呀姐話拉大隊去配隱形眼鏡咯！於是，我就跟埋佢地一齊去配咗一副啦。第一次戴隱形眼鏡既感覺好奇妙，我真係果一刻先知一切事物既真正樣子，連自己面上的暗瘡都睇得一清二楚。自此以後，我唔再戴眼鏡，亦一路使用隱形眼鏡。

早幾年，自認視力冇得頂既爸爸開始成日話睇野唔清楚，要配老花鏡。我就繼續做我既迷你野，後來我都有試下拎佢副眼鏡黎戴下，發現一個現象：戴咗老花鏡，物件睇落去會比正常視力既人所睇到既大咗；戴咗近視鏡呢，d野就會細粒咗。所以如果一個戴住近視鏡既人話：「嘩！你d野好細呀！」我會有所保留。但如果上述既說話出自一個戴住老花鏡既人口中呢，呢句就係真正既讚賞啦。我親身體驗過架!

因為唔覺得有需要用眼鏡，所以屋企果副士啤鏡都只係一年用得幾次，每次都係因為自己唔記得係浸con果陣放中和葯又或者俾屋企果兩位「唔小心」隊冧咗個眼鏡盒，搞到副con根本成晚冇浸過，唔戴得，間中有一次半次真係只眼發炎，咁就唯有戴副嚇瓜人金絲鏡返工頂住。呢副鏡犀利咯，戴咗就殺氣大啦，冇人敢駁嘴！

雖然，我最近好好彩，都配咗一副既舒適、又唔核突既近視鏡。視光師話：「你仲未駛配老花住，出年啦，或者出年你會再黎搵我既。」我都明白，唔駛用隱形眼鏡會慳返好多買洗眼鏡同保養既錢，而且戴眼鏡都幾方便，隨手一放就可以上床訓覺，但始終都係覺得戴隱形眼鏡舒服好多。

有時，我做完d迷你野，都想睇真d放大咗之後有冇瑕疵架麻，以前就用放大鏡左照右照又或者用相機拍低再zoom大佢黎睇既，後來見爸爸副老花鏡咁方便（佢又係要睇細字先戴既），咪拎黎用下咯。點知就俾佢寸我啦：「自己有老花又唔配眼鏡，好心你就自己配返副啦，成日拎咗我副眼鏡！」