生炒糯米飯?

眾人媽打話小寒要食糯米飯，等我又同大家分享下我既懶人心得啦。

話說有日放工，我突然心血來潮想試下煮糯米飯(其實我未煮過架，食就食得多)，但賓賓已經煮好晒d飯餸啦。

好似話糯米要浸一輪先煮得架喎，我冇時間，於是就用個細既蒸糕盆加滾水浸住d糯米，用另一只碗又浸蝦米，再用滾水加少少糖去浸冬菰(加咗糖會易淋d)，就走去食飯。通常急就章都係會用呢d屎橋，去加快煮食進度既。

半個鐘後，食完飯，渣乾d冬菰水，用少少糖同粟粉撈下佢。

泌返少少浸糯米既水出黎，但水位又留返至米面睇落去好似冇乜水咁（其實仲有好多水既）。放晒果d冬菰、蝦米同臘味上去，隔水蒸十五分鐘。

記住呀: 如果唔清楚自己只糯米既受水程度, 情願少放一D水, 都好過變成爛飯冇得marn呀!

夾起d冬菰同臘味出黎切粒(期間你咪由得d糯米飯繼續蒸咯)，收火，將飯上的蝦米裝起，打鬆d飯。

唔熟手就咪懶叻呀，出術用易潔鑊啦！

起鑊用少少油爆下d冬菰先，灒少少酒，放埋d蝦米同臘味入去兜下，加糯米飯去炒，如果你覺得糯米飯仲係有d硬，又可以趁呢個時候灑少少水去繼續炒下唧！最後加返d色水或隨個人喜好放少少鹽同蔥粒。

又有人話: 嘩嗄! 我手腳慢喎, 咁d臘味咪會炒到燶? 唉, 自己知自已事, 如果係咁, 就先放糯米, 後放臘味粒啦!

我做野一向快手，如果只係煮一個細糕盆咁既份量，醃冬菰、洗臘腸之類既工作頂多咪五分鐘，計埋蒸飯切材料，再炒埋都唔駛一粒鐘啦。（前期浸材料同米既時間我係食緊飯既，咁就唔好計啦。）

呢個方法有個好處，只要屋企有材料，就可以失驚無神話煮就煮，而且做出黎既效果好似真係生炒出黎咁款，色、香、味俱全架。(如果你仲學人最後食果陣放d蛋絲同花生, 咁就冇得頂啦!)

冇相睇架，事關家陣屋企好少煮肉，連臘味都唔買啦，邊有得過你食吖。

唔信？我話咗我成日呃細路架啦！