新派揮春

我成日做既野，都好簡單．

就好似呢ｄ反傳統既揮春咁：

我點敢同人講話佢地係紙蕾絲呀？想笑瓜人咩？

咁不如叫佢地做新派賀年揮春把啦．

咪睇呢度得果十零張呀，其實都花咗唔少"力"，先做到出黎架．

兔斯基係Bibi鍾意既公仔黎，佢一向既品味都同一般女仔唔同，唔係幾喜歡女仔野既．我都係，ｄ女性化野都唔係我杯茶，呢ｄ可能係遺傳黎．

我既首選：呢個出入平安，係咪好正呢？

為咗配合唔同人既接受能力，我都做咗ｄ冇咁搞野既：

東成西就，人人合用

步步高陞咩，無論後生仔同學生都啱架．

黃金滿屋都幾盞吖，不過，相信我ｄ耆英家姐接受唔到啦，咁唯有乖乖地做返ｄ龍馬精神，學業進步啦．

呢個花生漫畫，我只係做咗一個咋，係送俾Birthday Girl既．

第一步要畫好晒ｄ格格，我咁慳家，張牛油紙都要物盡其用架．

跟住要沿住ｄ線督窿，就係用呢枝工具啦．

督完就係咁款既：

咁就可以係上面畫野啦，畫完就跟住逐個窿剪，先有呢ｄ狗牙邊既效果．

咁都未完架，逐張剪出黎之後，仲要反身，係皮墊上用工具壓凸一次，就係用呢枝工具去壓出凸紋．

順便將ｄ線畫圓滑ｄ，整完張紙仔就會少少卷起既．

做完之後，手板就傷咯．

跟住就到鑲嵌啦，每個匙扣都唔係咁平整既，有所謂既水口（即係多餘既膠邊），要磨走佢先可以用架．

放好張牛油紙，啪返好塊膠片．咁都未得住，仲要加返個扣，呢下就和味咯．．．．

用舊木仔輔助，搞一兩粒已經好鬼痛啦！呢ｄ就係戰績啦．點解唔用鉗？會傷到ｄ金屬同膠架麻．

各位：你地覺得過癮既背後，就係我呢個one man山寨廠既辛勞啦．

P.S. 行過利源東街，見到呢Ｄ匙扣，入面只係鑲咗一張白紙，就咁印咗黑色標楷體既中文譯名，如"安德魯"，竟然索價HK$35！確係呃鬼喎！真係難為我整得咁辛苦咯！