呢輪ｄ橙相當靚，又大隻，所以我都有買俾"阿仔"食．
既然就黎情人節咯喎，咁就等我都試下整朱古力橙皮先！
誰不知起三隻橙既橙皮，原來好耐架，搞咗我成粒鐘．
人地話要切走白色既部份喎，驚會澀掛？起完皮之後咪得卡紙咁薄？我明明記得以前Furama既廚師做果d係有埋白色架喎！
人地咁教，我都要跟既．但冇人話我唔可以留少少唔切走白色部份去測試架？
於是我就留返一塊黎玩下，再將ｄ橙皮切成絲，又花咗幾個字時間．
要用大滾水煮兩至三分鐘喎，咁我呢度咁多，就煮夠三分鐘啦．一路煲，都幾大陣果味．
跟住撈起晒ｄ橙皮，倒晒ｄ水．洗乾淨個煲先．
嗄？煲滾少少水，有幾少？我點知喎？求其放ｄ水入煲，都有成碗水呀，蠢咗添！
實情係：水唔夠可以再加，多得滯就盞晒料，咁要放幾多糖先夠呀？
人地話要加入砂糖，煮到好似食西多果ｄ糖膠咁．我呢個笨蛋竟然唔識倒走ｄ水，由得佢咁多水，就走去落糖，咁梗係要用好多糖先掂啦．．．．
我用黃糖，終於都夠杰啦掛，掉ｄ橙皮入去，一滾就起晒泡，食譜話要煲一陣喎，要見到ｄ橙皮透明先ｏｋ喎，仲話好快添！
咁我唔鬼理啦，都唔知點先叫透，反正都熟架啦，至多到時會硬ｄ既唧．
我用隻大杯裝起佢，連埋ｄ糖水，由得佢浸，等佢入味．人地食譜話要浸兩三日，我只係浸咗一日，都好似夠入味喎．
第二朝，拎一條有埋白色部份既試下先．一ｄ都唔澀喎，唔通係因為ｄ橙靚？
睇落都幾晶瑩剔透，連埋糖水食，偏甜喎．
到咗下晝，我用筷子夾去多餘既糖膠．
知唔知咩叫掛杯呀？我就係咁逐條逐條夾走ｄ糖膠架啦．
跟住食譜話要放係牛油紙上吹乾．
牛油紙我係用黎做印仔架麻，點可以咁晒架？咁用隻碟裝住算啦，等我用抽濕機幫下手先．抽咗幾粒鐘，乾乾地身，又拎條黎食下先．唔．．．有少少un既，唔知點埋朱古力會點味呢？再晾乾d先啦，期間，都俾人偷食咗幾條．爸爸貪大，主攻有埋白色皮果ｄ．
第二朝，一早就開工啦．
先要整溶ｄ朱古力，我初初切到半厘米咁大粒
放入微爐度叮溶佢，比較麻煩，又要睇火．
後尾我將ｄ朱古力削到咁，放入碗，再座熱水，就好滑溜啦
俾條橙皮沾滿朱古力，放係錫紙上，等佢自己凝固就得啦．
我分別用咗100%，71%同80%既黑朱古力去試．似乎一般人會接受71%多ｄ．
又試食下先，都ｏｋ喎！食你地唔ｃ，算你地大命！
反正都仲有橙係度，等我再玩多次先！
因為有經驗啦，我用咗唔駛半個鐘就起晒ｄ橙皮，仲切埋絲添．點解咁快？我用咗平日既開橙大法，好似起果皮咁起出四瓣皮，再一開三，好輕易咁起出橙色部份，再一開二，成為大小一至既長條型．
好明顯，今次ｄ橙皮冇咁滑溜，所以我先用滾水煮佢地三分鐘，隔走晒ｄ水，再煲ｄ滾水用黎沖洗多一次，才隔水備用．
今次既糖水我專登整稀少少，亦只係浸過夜就算，睇下可唔可以減低佢既甜度．
抽濕兩粒鐘先，試一條，唔．．．咁既甜度就差唔多啦．再出術，去微爐度叮一陣，等再拎出黎攤下，又俾抽濕機抽一輪，比較乾身啦，又可以用咯．
咁ｄ朱古力用咩味好呢？不如加ｄ忌廉整松露橙皮咯！本身屋企ｄ100%朱古力磚係冇甜味既，都係咪冒險啦！
咦！Bibi有盒Lindt係度喎！
不如試下名牌咯，佢果頭話隨便我用，一陣見到我一用就用咗十塊，又牙痛咁聲啦．
果然滑溜，切到咁大塊，仲溶得好快添．因為佢只配給我１１塊，要好慳先得，勉強蓋到表面咋．
好，第二批次都出埋世啦，今次既實驗都夠皮咯．
總結：其實ｄ橙皮真係可以要埋白色部分既，有佢係度，好食ｄ，口感亦豐富ｄ．我就主張唔好太甜既，所以係糖水度浸一晚都夠啦．最方便都係買現成dark choco黎用，味道標準之餘，亦易控制．因為本身橙皮已有甜味，唔駛用牛奶朱古力架啦．
咁點預份量呢？三隻大橙，約莫要用70-80克既朱古力架，咁一排黑朱古力多數都係100克既，夠架啦．唔好貪心，因為朱古力會凝固既，每次剝三四粒出黎用，用晒先再加，咁就唔晒野啦．
外面買橙皮朱古力會好貴，都係自己整化算．
若然再做，我會參考外國人既煮法：橙皮保留白色部份（Leonidas果ｄ都係咁既），用鹽水浸一輪，再拎去煲．煲多幾次（每次三分鐘），過多幾次水都唔怕，基本上ｄ橙皮冇咁快腍既．放入糖水度亦可以多煮一陣，就算二三十分鐘唔緊要．跟住就唔浸啦，凝乾水，佢吹幾個鐘就用黎點朱口力漿就得啦．
若然大家有興趣，睇以下呢個食譜同煮法就最標準啦：
同場加影心心朱古力兩粒，送俾一對朋友．
我同Bibi都食咗剩低既半粒份量，雖然賣相差ｄ，但味道都唔錯喎．
我另外真係用咗100%朱古力磚，求其加蜜糖，牛油同忌廉做咗味道接近90%黑朱古力，俾公司既白老鼠試下．
希望大家千其咪反肚至好呀！
謝謝分享我希望情人節有時間整到啦^^
回覆刪除