原本呢樣係我地今年既情人餐黎，點知爸爸叻唔切，14/2果晚同我浸咗第二ｄ菜，咁唯有照煮飯食，到咗第二晚先煮呢味．
係百佳，紐西蘭青口做特價$19.9一盒，連殼既，有成500克．(依家買仲點會咁平吖)
睇指示，就咁叮黎食或者拎黎BBQ都得，咁簡單，咪整盒試下咯．
淨肉都幾大隻架，一盒有１２隻．
雖然係熟咗既，我咁潺，都係先起肉，沖洗一次先煮．起肉果陣記住用刀仔介一介果條粘實塊殼既肉柱喎．
意粉要烚腍，我係懶人，放ｄ鹽入水度，水滾就放意粉，再滾到起晒泡就收火，記住撩勻d先呀，由得佢蓋住焗一陣，就腍晒架啦．咩叫腍？夾一條上黎搣斷佢，中間心冇白色點，就叫熟透啦．(如果打開蓋佢未夠腍點算呀？咪再煲返滾焗多陣咯！乜話？打開蓋冇晒水？你唔識加返ｄ滾水入去既咩？)
薯仔切粒，用少少水煮腍，爸爸切到樣衰衰咁，算啦，都係咁食唧．
另一意外驚喜係呢ｄ急凍日本八爪魚仔，佢早就切碎咗架啦，解凍之後沖洗一下就用得啦，而且口感唔錯．
有機菠菜苗係好好味既，我將佢係咁意切碎．
做法（哩哩臨臨咁煮，唔記得影相添）：
1. 放少少油，用蒜片起鑊，放入青口兜炒（如果你係好怕腥既人，可以贊少少酒一齊炒架），跟住加八爪魚，兜炒．
2. 連埋ｄ烚薯仔既水，倒晒入去，雪櫃仲有少少粟米，又加埋入去，想要多ｄ汁就加ｄ水添．
3. 煮一陣，等青口熱透．加菠菜，煮一分鐘．
4. 加盒細既鮮忌廉，唔打獻都得啦，加咗忌廉就會杰身ｄ架啦．放ｄ鹽同胡椒粉調味就得啦．
夾ｄ意粉上碟，就咁淋ｄ材料同汁上去就食得．（嗄？你又手腳慢，ｄ意粉攤凍晒都未煮好材料呀？冇緊要，夾ｄ意粉上碟後，叮下佢，叮熱之後咪可以照淋材料咯．）
Bibi：咦！ｄ青口唔腥架喎！
我食完一大碟，都唔覺滯，都幾好味．早知就放埋ｄ青衣柳啦．．．．
沒有留言:
張貼留言