肉碎煮玉豆

又一味簡單易做既菜式，相信剛踏入主婦實習班既姪女，必然一學就會．

材料：肉碎，玉豆，蒜頭，豆豉

肉碎以豉油，糖，鹽調味，再加豆粉（粟粉）撈勻



玉豆洗淨，搣去頭尾，最好順手連中間條筋都撕走，再切斷．

在煲內放水，加豆

烚約五分鐘或至自己喜歡既軟硬度，收火備用

豆豉沖洗後，浸一分鐘

隔去水份後，用筷子略督爛

蒜頭應該切成蓉，但我唔食既，所以切大條ｄ，唔怕中招．

放一湯匙油起鑊

爆肉碎

放蒜頭豆豉，兜炒，咁都夠味架啦，唔駛下下整到成間屋都係蒜頭豆豉既油煙味既．

炒到八成熟（即係肉碎表面都轉晒色啦），可以放埋ｄ玉豆同烚玉豆既水入去炆下（如果烚完玉豆既水太多，就唔好一二三倒晒入去隻鑊度喎）

加少許鹽及一湯匙蠔油，煮到肉碎全熟，用粟粉水埋獻後即可上碟．

記住喎：粟粉水係先將粟粉放入碗，加少少水（２湯匙差唔多架啦，視乎你要加幾多粟粉去打獻既唧），攪勻先一路逐少加入鑊度，一路用鑊鏟推勻ｄ食物，見到夠杰身就收手咯喎，唔一定開咗幾多粟粉獻都要落晒架，如果唔係容乜易變漿糊架！

學曉咗偷懶既方法，都應該知實在點樣煮先為之正統既，順便睇埋佢啦，第日你煮得叻ｄ既時候，就可以咁整啦．

正經做法：

１．用少許油，爆炒肉碎，盛起備用．

２．用油爆香蒜蓉豆豉，加玉豆兜炒，再放大半碗水，加蓋煮至豆變腍．

３．加鹽及少許糖（唔一定要放蠔油既），放回肉碎，喜歡深色ｄ既，可以放少少老抽加色，煮到肉碎全熟後埋獻．

４．收火後放幾滴麻油提升香氣．

其實咁做都好易架咋！