老火冬瓜湯

買咗一大舊冬瓜，都係清清地，用黎煲湯啦．

材料：冬瓜，排骨（豬展，瘦肉，西施骨隨你喜歡），中式火腿片，果皮一角

製法：
果皮一角，先浸軟，刮去內層既囊先用，咁就唔濕熱啦．

冬瓜洗淨，連皮切大件，保留瓜囊．因為ｄ瓜皮係有益既，用埋黎煲湯先好架．
如果屋企有小朋友或長者既家庭呢，我就健議你將瓜皮切下，然後用針同棉線穿起晒ｄ皮（線頭要連埋打個結喎），成串咁放埋入煲度煮，煲好湯之後，再成抽夾起掉咗佢，咁ｄ瓜就方便佢地食啦．

你地可以用瘦肉，豬展或者排骨既，我就比較喜歡西施骨，記住煲ｄ滾水，將洗乾淨既肉／骨拖拖水喎，去走ｄ血污麻．

我上次去美食博覽買咗舊煊威火腿，一返到去就將佢解體，切成一片片，分開一份份（兩三塊左右），用錫紙包好，放入冰格儲存．今次正好拎一份出黎用．

若然你喜歡既話，都可以加埋瑤柱架．

瑤柱浸軟，跟手拆成絲，瑤柱水可以稍後加埋入ｄ湯度煮．

凍水放果皮，滾起就加冬瓜，肉／骨，火腿片，瑤柱及瑤柱水．

用明火去煲既話，煲滾咗，改中細火煲個半鐘，加鹽調味就得啦．

用真空煲呢，煲滾咗，改中火煲十分鐘，放返入外殼度，一個鐘後拎出黎翻滾，滾起煲多十分鐘，放返入外殼度，一個鐘後再拎出黎滾返，加鹽調味就得啦．（咁話得用真空煲就係要方便架啦，期間你鍾意放耐ｄ係殼入面都得既，出味ｄ唧．）