冬菰肉餅改良版：麥皮大翻身

仲記唔得我果篇"搖控Bibi肉餅 - 冬菰蒸肉餅"呀?
雖然果碟簡易版已經好好味架啦，但係可以進一步提升餸菜質素既話，我都想佢學埋既．

原來只要稍為改變食譜，就可以煮到滑滑既蒸肉餅啦．

我用咗五隻中型冬菰，浸軟d冬菰，渣出水份．




切粒，用少少糖撈勻，再加少少生粉撈勻．睇落好少？夠架啦．



呢度係十二個幾既本地新鮮屠宰免治豬肉，用鹽，糖同埋生抽先撈好，今次我地唔駛加生粉去撈啦．點解呢？

因為今次我地出殺手鐧．．．．．

登．．．登．．．登．．．dun．．．

就係佢啦！

原來只要加ｄ麥皮入肉餅度，同時加ｄ水（落幾多？視乎你喜歡幾多汁啦，可以放四分一至小半飯碗水既），我呢．．．．　就放咗呢隻膠匙既1.5匙麥皮，咁就唔駛再放生粉，而且仲可以好滑架．

麥皮可以降膽固醇，加ｄ入肉餅度，大家唔覺唔覺就食咗架啦，而且係食唔出既．

將三樣野撈埋晒，加水，同埋少少橄欖油，搞勻ｄ就得啦．

好啦，可以蒸啦．都幾大碟架．

有幾大？你睇下：


大約蒸半個鐘啦，咁就一定熟晒．

雖然放咗咁多水，蒸完出黎都唔會水汪汪，而且一ｄ都唔鞋．連麻麻煩煩既爸爸都冇投訴，仲爭食添．

成日話自己唔食麥皮既朋友，食過呢碟餸之後，包你會對麥皮改觀既！