煊威火腿鮮蓮子薏米冬瓜煲豬尾骨

係荃灣街市買到靚鮮蓮子，$18半斤，拎咗返屋企冇件事，放咗兩日先醒起。真係對佢唔住，唯有拎黎煲湯啦。

果皮浸軟刮去內層、去冰格拎一份火腿加料。

求其挪D薏米，其實多多少少都冇乜問題既。浸一陣就可以沖洗備用。

我買到豬尾骨，貪佢有益D，可以補腰骨。你地用豬展或者瘦肉，其至湯骨飛排都得架。飛水備用。

冬瓜連皮，洗淨切大塊，我呢舊只切成六件咋。

蓮子開邊，去芯。

洗洗就用得，我用咗四兩咋，都夠架啦。其餘果四兩，我就煲一分鐘，隔水攤凍，包起佢放入冰格第日用。

其實蓮子芯係有藥用價值既，可以清心去熱，如果你心火盛搞到失眠，就可以拎黎煲茶飲。只要清洗乾淨，索乾水份，風乾後可以收藏，需要時就拎黎焗茶飲就得啦。

煮呢個湯，相當簡單。凍水放果皮，水滾後加火腿、薏米及豬骨。滾起再加冬瓜，中火煲半個鐘。放蓮子再轉中小火煲一個鐘。下鹽調味即成。

我冇放瑤柱，都好夠味。

冬瓜、蓮子的鮮甜被火腿吊出味道，確係清鮮味美。