工展會2010

18/12，我去咗工展會啦！

果日呢．．．我就約咗阿草一齊，先去利舞臺既客家好棧飲茶，係咁意叫咗一個$18既早晨套餐，佢有十幾樣野揀既，但我地就要咗豉汁排骨飯

配潮州粉果，唔好意思，食咗一隻先記得影．

腐皮卷，竟然有四條！

一碟煎蝦米腸，所有食物都好熱辣辣，水滾茶靚，完全符合我既要求．老實講，碟腐皮卷就油咗ｄ啦．

你地估幾錢埋單呢？

兩位都只係＄39.5咋！仲唔抵食過快餐店！

十一點鬆ｄ，我地就去行工展會啦，呢ｄ就係我地雙劍合璧既收穫啦，加埋我地係現場食咗既芒果pancake（$10），熱雪梨茶（$10），兩隻唔知咩螺（$6隻），兩個人加埋大概用咗七百蚊啦．

攤開俾大家睇下：

四包威化($28)

薑糖三包($20)

初初我見到有$6.5一包架，但見到封面張相，好似有砂糖面咁既？驚太甜，唔買．點知呢檔有得試食，原來唔係砂糖，只係糖霜，品質都幾好，冇新亞咁甜．既然佢有請我食，貴丁丁唧，好，我買．

呢一檔，我地行近既時候做緊咩十分鐘優惠，全場既餅食都係十蚊．又聽到佢話咩鳳凰卷既餡淨得椰絲同芝麻，冇砂糖既，呢下好似幾特別喎，好，我買！一人兩盒．

買完野，我地拆盒黎食下，咦？都有甜味架喎，原來蛋卷皮係甜既．獨立包庄，都幾好．

我覺得最值得買既，係呢樣，有機紫無花果同杏脯．$120七包，阿草要兩包無花果，一包杏脯．我咁識貨，梗係要晒四包杏脯啦！

點解？因為有機紫無花果我食過好多，各個品牌差別唔大，冇乜驚喜．但呢隻杏脯呢．．．

推廣員雖然只係俾咗丁丁粒我試（佢實在太孤寒啦，切到綠豆咁細粒，都唔知有冇搞錯既），但我一入口就立即評到分啦．１００分呀！！！

唔好以為佢唔係橙色就唔鮮呀，呢ｄ先係真正既天然色黎架，一入口便知龍與鳳，有陣陣幽香滲出，齒頰留香呀（但唔係發酵既酒味喎）．

買呢包腐竹條，又係一個機緣，果一刻冇乜人買緊野架，個搞笑妹妹仔捧住兜枝竹條俾大家試食，同時有三杯不同既辣醬，供大家點食．我仲以為係零食黎添！點知呢ｄ好似我手指尾咁上下大既東東係可以用黎打邊爐，炒，炆之類用途既．$10包，好，買！

點知，個妹妹仔話：依家做緊咩十分鐘優惠，買一包送一罐鯪魚，買五包就送一包，即係＄50六包．咁橋？又係我地行到佢個檔做緊優惠？

阿草問：嗄，買一包送一罐，咁買六包係咪送六罐呀？

佢話係喎！仲話家陣係最後兩分鐘．咁我地兩個傻瓜就真係俾咗$50，帶走咗六包枝竹，同六罐鯪魚，係咪好得人驚呀？我就唔食得咁多罐既，要兩罐得啦．

呢包韓國菰仔（＄10），好新鮮，一炒就食得，正！我夜晚就用佢咗佢黎炒黃芽白．

呢三包野加埋廿五蚊，阿草既．

阿草又買蔗糖光酥餅（$10），胎菊($35)

呢ｄ係台式奶茶黎，$60兩盒，有好多味，我全部試勻晒，始終都係覺得士多啤梨最正．佢仲送多三包俾我．

阿草奉命要去紹香園買柑橘，但賣晒，唯有買豬肉乾($20份)頂數，又去沙嗲王買咗枝辣醬($6)

＄80三對襪褲或legging，買俾Bibi都好．返去試過，果然好有彈性，啱晒長腿小姐啦．

早上去超市買盒庄紙，見有二合一奶茶（$19.9），爭ｄ買咗．諗住一陣都去工展咯，就hold住先啦．點知，工展現場$50四盒呀！

十蚊包蕃茄梳打（約大包庄兩倍咁多啦），十蚊四包甘栗．

$12一包巖鹽，$50就五包

現場有架衛生署宣傳車，有老夫子磁石書籤同杯墊派．

講開又講，拿，事先聲明，我唔係咩代言人，亦冇咩著數拎過既：緣素都有係度擺檔，想試既朋友可以去買下既．