一碗冷飯三個人食 － 認真版湯飯

屋企得一碗冷飯，點先可以砌到佢夠三個人食呢？

我決定整湯飯．材料有冷飯，薑絲，肉碎（用豉油，糖，鹽同生粉調味）同埋瑤柱

瑤柱浸軟，ｄ水要黎煮湯飯時用埋佢，跟手拆成絲

冬菜，冇都唔緊要既，加添味道唧．

唐生菜一大棵，洗淨切粗絲

見有釀豆卜係度，加埋佢．

用油炒熟肉碎，盛起備用．（咁多？係呀，我貪心，我認架！）

用油爆香冬菜

加瑤柱絲炒下，贊少少酒，就僻腥兼增香氣啦

放水入煲，加埋ｄ瑤柱水連同爆香咗既冬菜同瑤柱一齊煮，滾起，加冷飯，滾幾分鐘，加豆卜煮一陣，確保魚肉熟透．

加肉碎同薑絲，再煮一分鐘，最後加埋ｄ生菜，放鹽調味，食得．

煮起，一人有成兩三碗架．

係架啦，冇乜飯架其實，但有湯飲，又有菜食，味道亦相當好架，而且係好快就煮好既．因為放咗瑤柱既關係，食果陣有少少好似食緊蠔仔粥咁既感覺，正呀！