慶中秋@紅茶館

中秋節，爸爸要返工，咁就訂定檯同Bibi食西餐啦。

今次我揀咗食油麻地呢間既二人團購餐， $199 二人紅茶館特選 5 道菜晚餐。

牛油果煙三文魚他他配沙律菜: 好味!

海鮮忌廉湯配蒜蓉法包

熱度都合格，都幾多材料既。

法包呢，又暖又外脆內軟，正!

炭燒紐西蘭肉眼扒，配薯菜，Bibi選咗要七成熟。我仲以為薯菜既薯係炸薯條黎添，估唔到D配菜都咁認真，係一隻好靚仔既新薯BB黎，加埋意大利翠玉瓜、車厘茄同小豆角，好精緻。

我地兩個都冇揀羊架，我要咗加拿大鱲魚柳配黑松露菌忌廉汁，我諗住係薯條，咪話唔要薯仔咯，佢竟然俾雙份配菜我喎! 認真老實呀，可惜我邊有咁好食力吖。

意大利翠玉瓜咁多件，真係食唔晒，仲有成堆小豆角呢，又脆又新鮮，唔會烚到過火。

牛柳我冇辦法俾意見你地，因為我唔食牛既，我對牛肉有少少敏感架。但我呢塊魚柳呢，真係好大件，基本上D汁蓋住既地方都係塊魚既部份黎，想唔想像到有幾大件呀? 又厚肉喎，大家都睇到啦，係冇厚粉遮住架，外層煎到少少脆，但又唔油喎。要俾個咕佢!

我唔主張大家貪心，食唔晒就唔好要咁多啦。我地真係飽架啦，所以只請人俾一客綠茶雪糕我地就算啦。

係哈仔綠茶雪糕黎架，果件窩夫，都係堅既。同我食開果D比利時貨式一樣味，而裝飾既士多啤梨同薄荷葉都係靚野黎，好新鮮。

今日咁啱係星期四，原來團購餐已經係無限添飲咖啡或茶架啦，而今晚我地仲可以免費升級要特飲添!

Bibi要咗蜜糖檸檬梳打，佢話太甜。

我就要咗鮮忌廉咖啡，咖啡味都好出，唔會太甜，我飲完肚仔冇事，即係呢度靠得住啦。


咁既食物質素，可以講得上係超級抵，俾埋加一都只係$220。

今日過節，佢地啲侍應又有禮貌，態度又好好，連洗手間鎖匙佢都係雙手奉上既，所以我再俾多卅蚊做貼士，等佢地都開心下。


個侍應係老實人，佢見我俾咗$50，同佢講聲中秋節快樂就起身走人，就再同我講多次:只要俾廿蚊架咋。

跟住我同佢笑下：得架啦！

中秋節應該大家都快樂既。