May姨blog: 11月 2009

2009年11月30日星期一

白果腐竹糖水

由 May姨blog 於 2009-11-30 00:00:00 發表 | 累積瀏覽 223

分類：甜品

天氣乾燥，梗係要煲ｄ糖水黎潤下啦．

原本白果腐竹薏米係最佳配搭黎，但我懶，費事搵薏米啦，一樣煮到唧．（其實加西米都唔錯架，但用洋薏米就滑ｄ）

材料（煲完約五碗份）：起碼都放六七碗水啦，二兩腐竹，白果十零粒，片糖一磚，薑片（落唔落都得）

做法：白果去殼及衣，用刀略為拍扁，放入水，要加薑既就加啦，煮到滾；

2009年11月29日星期日

Bibi生日的一天

28/11，雖然這一天我放了半日假，但前一晚放工時已預計積壓的工作留到星期一會更慘，怎麼搞的呢？每次放假也會特別忙．

沒有出外吃早餐，Bibi自己煮了拉麵．午餐亦不會有多大胃口，所以我煎了餃子給她吃．下午要補習，六點才下課，約定大家在山景村集合，在從前照顧過她的媬姆嬸嬸家吃蛋糕．

這麼快就十七年了，Bibi出生時那家的哥哥才讀大一，小妹才升中學．現在小妹子也碩士畢業了兩年多啦！我知道這樣晚才拿蛋糕到人家裏有點打擾，但只抽到這個時間，沒法子，相信嬸嬸伯伯一家也不會生氣吧．他們還煮了紅豆沙給大家吃呢！

伯伯的一手硬筆書法，可厲害的緊，我亦厚面皮的帶備紙筆去求字，好豐富我的書法章麻！

我特地到市中心的日本食品節看看，買了牛奶布丁做伴手禮

當然有為自己買三個回家嚐嚐啦，又香又甜又滑，真滋味啊！

吃完瓶子還可以循環再用呢！

加上水果一個，這就是Bibi的生日晚餐了，還要再繼續趕她的功課呢！

知道她的Applied Maths成績不好，但她郤十分抗拒一大班人的補習班，又見她天昏地暗地操數，好彩的，就兜老個大圈子才把問題解決，不好彩呢，就沮喪加苦惱．有時，讀書，真不是勤力就會得到回報架．今回真是皇帝唔急太監急，良師難求啊！

2009年11月28日星期六

一張聖誕訂單

因為十月中既義賣 (請參閱義賣後記)，有人睇中咗呢d磁石書籤，打算訂黎送俾朋友做聖誕禮物．

好不容易，搞了幾天，終於做了人客指定的款式及數量．

既然都接得呢張單咯，咁不如順口問埋佢要唔要買埋卡啦？

佢話：都好喎！

就係咁，錢早就收咗，仲捐埋出去添．未有耐聖誕節麻，我咁懶，梗係一路都未開工啦．趁住Bibi生日，我請咗半日假，咁就即刻開工啦．

一個早上就做好啦！既然咁大工程，刻得個印咯，整多少少自用都好喎！

我咁慳家，點會豪花，買咁多凸字粉吖，我得金色同透明粉咋，呢ｄ係師奶分俾我玩既．

2009年11月27日星期五

我的童年回憶，龍門大酒樓

我在灣仔長大，零零碎碎的記憶由學步時開始。

第一次搬家、上幼稚園；哥哥湊我上小學接放學、二年級開始自己上學；升上中學要坐叮叮到銅鑼灣，傻傻呼呼的，電車故障就只懂走路回家；初出來做事，活動範圍離不開中環至銅鑼灣。

童年既記憶已經模糊，對這間快要結業的老字號酒樓，印象最深刻的，反而是爸爸叫我到燒味部斬料的情影。小小年紀的我，在心臟狂跳底下，口震震的叫櫃檯的叔叔給我斬「一條骨」，懂甚麼燒肉靚不靚？只願掌刀的叔叔行行好，給我斬皮脆肉軟的部分。我知道，清脆的一聲童音說出「唔該！」通常都會有好結果的。至於喝茶、飲宴麻，差不多印象全失（反而結業三十多年的冠海，宴席單尾的焗蓮蓉西米布丁令我一見難忘，雖然我連一口也有吃，小孩子掙到吃魚那一道菜已夠飽死的了！），想來，最後一次在此喝茶，已是廿多年前的事。

我對龍門隔不多遠的雙喜樓，印象仍深。還要坐高椅子的時候，我已在此吃晚飯。通常是爸爸帶著，跟世叔伯們一起吃的。偶爾，爸爸亦會帶著家內最小的幾個小鬼一塊到此晚膳。因為一年裏頭，總會吃上幾次，所以記憶尚未移除。印象比較深的一幕，是被大人作弄，夾起一塊蝴蝶形的薑片給我嚐嚐。還有一次，跟家人的飯聚，爸爸正正式式的在點菜時問我：「十大以小為尊，你今天想吃甚麼呀？」當我答要吃蟹時，不友善的目光就從各方射來，抱怨我點選這麼麻煩的菜式。

我可還記得．．．我當時真的想吃蟹呢．．．

有人疼的感覺真好！

P.S. 大家可以係呢度，睇返有關果集既港台節目，鏗鏘集架：http://www.rthk.org.hk/rthk/tv/hkcc/20091206.html

2009 Christmas Gift - from Triangel

十二月都未到，就收到聖誕禮物啦！

這是今年第一張聖火卡，厲害啊！一睇，暈得一陣陣，螢光色！我有嚴重散光既，唔關人事．

呢ｄMemo紙咁靚，點捨得用呀？每一張都有花過心思去加工架．

仲有Gift-tag同磁石夾，勁索我個打窿機呀！初初見佢地兩樣野粘埋咗，幾驚分開之後會整爛呀，可能ｄ光油遇潮會溶返呀．

聖誕襪，老花睇唔真，我仲以為係貼紙添！

諗住收埋ｄ野，咦！信封入面原來真係仲有張貼紙喎！

你地估係咪鬼太郎系列呢嗄？到底係單眼仔笑緊，定係我反轉咗黎睇，查實應該係個ｏ咀既人面呢嗄？考起！

笑緊既鬼太郎

八字眉既土人

2009年11月26日星期四

食素好去處 - Loving Hut 愛家素食

又搵到一個食素好去處啦，就係呢度呀：Loving Hut，愛家．

好易去，以前灣仔夏巴油站，即軒尼斯小學隔離．入口係電車路果邊，你一定唔會錯過，坐叮叮就係過咗大有之後果個車站落得啦．

呢度同淘大既Buddha Hut咁上下，仲光猛ｄ添．午餐大概三十幾至四十幾，亦有三款套餐（$30），經濟抵食．我地去到，都冇乜人幫襯既，灣仔實在太多食店啦．就算ｄ人堅持食素既，係幾分鐘腳程內都有成四五間素食館，競爭激烈．

呢度係純素既食店，抱持”維根”理念，不傷害任何生物既飲食態度．

我比較鍾意濕濕地，所以食悠樂湯河($30)，係包埋時菜同餐湯既，今日係雪梨南北杏煲粟米；時菜係暖暖地既，有一兜酸菜，配料主打係素牛肉．

等我地睇返Buddha Hut果ｄ，一睇ｄ燈光，明顯唔同feel，呢碗都係悠樂湯河($28)，但飲湯要加錢，春卷係另外買既．材料亦好唔同；灣仔果間明顯份量大ｄ，飲埋ｄ湯，爭ｄ食瓜我！

爸爸係個貪心鬼黎，佢要咗素漫波排飯，其實咪又係素曼如飯！($46)，以咁既價錢，算貴啦，但呢度係配紅麴米既．紅麴米，咩黎架？食落冇咩特別感覺咋喎，亦冇怪味既．

又睇下Buddha同佢有咩分別？Loving Hut係素曼下墊生既幼菜絲，Buddha Hut呢，就墊炒雜菜，前者$46連湯，後者$36加$4配飲品；咁Buddha Hut就好似抵食ｄ啦．最主要既分別，就係前者用咗紅麴米，但我比較喜歡食紅米飯．

所謂紅麴，係天然紅酵母所製，有營養，可補充身體所需，對體弱及老人家尤其有益．收銀附近都擺咗一籃子一包包既東東，唔知係可以買定係裝飾性陳列既呢？我冇走埋去研究過．

暫時對呢間食店印象好好，地方光猛又清潔（連洗手間都唔差），又唔駛我專登去到淘大咁遠，方便好多，會再帶人黎食過既．

2009年11月25日星期三

簡易甜品 - 紅豆糕

家長日，又要我出手啦！

放工，係樓下商場遇到家教會其中一位家長．

家長：我地就黎家長日咯喎，正想問下你．．．

我：又想食咩呀今次？

家長：就豆紅糕啦！

我：好！不過今次唔好咁大鑊啦，做兩底好啦，你預備好材料就call我啦．

唉～～～，乜佢地唔厭既咩？

其實紅豆糕同馬豆糕係一樣咁整法架咋，好多人都以為好難整，其實都係手板眼見功夫黎．

材料（一底既份量）：鷹粟粉（細盒就一盒，大盒就用半盒），大椰漿一罐，細花奶一罐(如果一次過做兩底, 我就用一罐大花奶, 抵d)，一磅砂糖(通常超市既細包庄砂糖都係一磅庄既, 怕甜就唔好落晒成包咯)，半包紅豆