你地有冇諗過，d冇用既布碎可以用黎做咩呢嗄？我冇整布公仔卅年咯，為咗示範下呢ｄ布係用得返既，所以先黎搞下．
咁啱縫藝學堂有教整熊仔喎（http://www.sewlover.com/doll/tutorial/teddybear_01.html），上面有晒詳細步驟同紙樣架，我咪跟住整隻玩下咯．
大家都知我慳家慣，又鍾意做ｄ細粒ｄ既野，所以我縮到個紙樣咁細先整．
剪好晒布，就可以開工啦．
縫好個身先，我唔興畫紙口位既，總之條紙口線就在心中啦！做手縫公仔，最緊要係針步夠細又平均．
塞棉花果陣先知佢原來咁細．我搵唔到Bibi幾年前整咕臣用剩既棉，監硬用金魚缸果種過濾棉頂住先．（好似硬咗ｄ喎！）
算啦，過幾日，再去縫手手
仲有腳腳
加埋腳板底先
反轉之後係咁架
睇下隻腳板底，
又拖咗一輪，幾驚爛尾呀！好難得先的起心肝整埋佢．
我都係改用毛冷黎做填料，真係軟好多喎！
跟住縫個頭，反身之後，似蜥蝪多ｄ
塞咗棉花之後，用線縫返個鼻同嘴
再加眼仔
整埋耳仔先
加咗之後，又似老鼠，唉～～爭對門牙咋！
釘上身度先
加手手
再加腳腳，可以企
又可以坐，仲識同大家揮手添！Hi!
等我介紹德仔俾你地識吖拿，ｎ年前麥記既大頭狗
佢好乖架！
係咁意縛隻蝴蝶結，已經夠靚啦！
如果大家都想玩下，又冇材料，我唔介意分ｄ布碎俾你地玩架，寄個貼咗$3郵票同寫好地址既回郵信封俾我，我就會將一份布布寄俾你．(或者你寄張地址label加一個$3郵票都得, 我可以用環保信封寄布布俾你既)
有興趣就私人留言啦，咪當係送份禮物俾自己咯．
記住喎，咪霸咗份材料就算喎，要應承我真係會做至好喎！整完要貼返張相俾我交差架，我會盡量分唔同款既布碎俾大家，咁到時就可以係網上擺返個熊仔show啦！
講下笑唧, 我唔係要俾壓力大家, 如果你地只係想玩下, 唔一定要交功課既, 我嚇下你地架咋!
沒有留言:
張貼留言