下午茶@和亭

下星期三，Bibi要去浸大行聯校畢業禮，下午剛好要去影聯校活動既Committee相，原本都順路既，但弊在大會要求當日同學著suit喎(而畢業禮則要著夏季校服)，咁就弊啦！咪要拎埋套衫同鞋出街？

Bibi只係高我少少，都可以著我ｄ返工衫既，但要搵對正正經經既鞋黎襯呢，就有問題啦．銀色鞋，同套suit唔襯喎，而對灰色老鼠鞋咩，又話唔正經喎．（車！我夠有對同款架咯，又咪一樣可以著返工．）佢係都話異相，依家ｄ年青人，真係．．．

所以今日既任務係要陪佢買鞋，反正佢都就快生日啦，就叫爸爸送俾佢做生日禮物啦．

第一站，當然係蒲圖書館啦！佢借咗呢幾本書，諗住做閱讀報告喎．

呢本Firebelly，係威係勢都叫做拎咗咁多獎項，或者都好睇喎，二百五十幾頁唧．

呢本The Running Man都有成280頁架，都係得獎書黎．

呢本The Silenced夠晒厚，五百幾頁，但版面較疏落，我反而覺得佢易睇ｄ喎，適合老花人士呀！

Bibi話要借返ｄ有水準少少既書，閱讀報告先可以寫得更有層次，唔可以停留係一兩年前既寫作模式架啦．咁又係既，但我開始覺得自己冇能力再同佢一齊睇同樣既書啦．

我順手執咗本手作書同精神科醫生譚詠康既散文，叫做消下閒啦．

下一站醫肚，諗住去和民既，點知去到先知已經變咗和亭，是但啦．咦！有下午茶食架喎，三點開始既．我地坐落，仲爭幾分鐘，睇得餐牌黎都差唔多啦．跟手落單，點知一睇，咦！14:59:57，仲爭三秒喎，咁算係午市定茶市呀？

事關午市同茶市都有同樣食物，但差價係十蚊一款，冇理由爭三秒就要俾多$22架（仲要加一架麻）？

所以我搵咗個女店員黎搞清楚，佢地都好有良心，冇計午市價錢，而且都算幾有禮．

我地叫既熱柚子蜜，麻麻地熱，呢ｄ係所有柚子蜜既通病，佢唔係暖暖地咪算偷笑咯！

Bibi既三文魚壽司飯加麵豉湯（$34），我加咗$4叫既腐皮壽司

我既滑蛋鰻魚飯加麵豉湯，都係$34，未食過咁腥既鰻魚飯，超難頂，搞到我連晚餐都食唔落．我以後都唔會係度食鰻飯架啦！

食完就去買鞋啦，Bibi終於揀咗呢對

我著起都幾好睇呀可？

可惜有咁多尾房出租呢！點解兩母女唔可以撈亂ｄ鞋著喎？

返到屋企樓下，見到麵包鋪有個騎哩蛋糕，Bibi初初仲以為係箭豬黎添，睇真ｄ，不得了，係西施黑森林黎喎！呢個屋苑多人養狗，或者都有市場既．做生意有ｄ創意係好既，比著我，有得亂舞，都唔知會搞ｄ咩花晨出黎咯！