放工，係樓下商場遇到家教會其中一位家長．
家長：我地就黎家長日咯喎，正想問下你．．．
我：又想食咩呀今次？
家長：就豆紅糕啦！
我：好！不過今次唔好咁大鑊啦，做兩底好啦，你預備好材料就call我啦．
唉～～～，乜佢地唔厭既咩？
其實紅豆糕同馬豆糕係一樣咁整法架咋，好多人都以為好難整，其實都係手板眼見功夫黎．
材料（一底既份量）：鷹粟粉（細盒就一盒，大盒就用半盒），大椰漿一罐，細花奶一罐(如果一次過做兩底, 我就用一罐大花奶, 抵d)，一磅砂糖(通常超市既細包庄砂糖都係一磅庄既, 怕甜就唔好落晒成包咯)，半包紅豆
上面呢幅相係四底既份量黎，我今次做兩底唧．
開始啦，先煮腍ｄ紅豆，ｄ水可以一陣用黎當係煮紅豆糕既水．d紅豆煮到咁既款就叫腍啦.
拿，我依家用一底既份量教大家，三飯碗水煮溶糖（普通八安士碗），順手倒埋ｄ煮腍咗既紅豆入去．滾起加花奶．
再滾起，加椰汁
放丁多鹽，可以提升椰汁既香氣
用一碗室溫開水，搞溶鷹粟粉；轉中火，將粟粉漿徐徐倒入煲內，一路不停搞拌，一路煮，煲內既野會一路好似溶岩咁滾起，記住鑊鏟要搞到底，千其咪令煲野粘底同煮燶呀！
（我一向都係用不鏽鋼煲去煮架咋，唔係咩易潔煲黎，所以人人都可以係屋企做到既．但係，你地千其咪學我，ｄ水位去到咁高，貼近煲邊呀，我一次過煮兩底先搞成咁架咋，雞手鴨腳就咪做呢ｄ危險動作呀，用個大ｄ既煲啦衰鬼！）
煮多陣啦，你會見到煲野好杰，好似漿糊咁，大概幾分鐘就搞掂，倒入容器，置涼就得啦．
拿，呢兩底糕就係咁誕生架啦．一包紅豆煮兩底，已經好見紅豆架啦，咪貪心，做一底又放晒成包豆喎，多豆得滯，口感反而冇咁平衡架．
沒有留言:
張貼留言