前日, 同阿草去探險黎, 點解? 因為....
大家都知我係路痴架啦, 點知, 原來佢都唔弱架! 雖然好我好多.....
我地第一站去咗旺角十蚊店, 好克制地只買了木仔.
跟住下一站大角咀店, 點知...原來阿草係唔識去架! 我仲咁老定, 諗住靠晒呢枝盲公竹添!
路在嘴邊, 一路行一路問, 但我地實在係懵丙黎, 所以問咗都差唔多等於冇問, 最後, 都係要自己解決.
我地走咗入地鐵站睇地圖, 厲害掛? 由旺角站行到去奧運站睇地圖呀! 唯有影低佢, 慢慢摸去啦.
經過富多來商場, 想話搵甘夫人求助架啦, 佢係地膽麻, 但都係費事煩佢啦.
千辛萬苦, 環遊大角咀, 行大運之後先搵到呢間小店.
咁辛苦黎到, 唔仔細d咁行, 好對自己唔住唧. 咦! 有熊貓晾衫夾喎, 啱晒熊貓先生啦, 唔知佢買咗未呢下?
我幾咁乖, 只係買咗咁少野咋, 呢個心心相架度高尺, 真係幾靚架, 廿蚊雞, 但d色就好靚, 我打算送俾兩個小朋友, 佢地都係囝囝黎, 其實女仔既粉紅色都好靚架. 衫夾我同阿草兩份, 有兩包木仔係幫人買既, 所以, 我夾埋行咗兩間十蚊店, 都只係用咗$89唧!
都成點幾鐘啦, 係時候去食d野啦. 我地諗住食米線, 見到對面街間譚仔鬼咁多人係門口等緊, 無謂同人迫吖.
食米線, 差極都有個譜既, 所以我地最後去咗一條馬路之隔既順德人.
我地兩個都係食呢個套餐, 阿草話紅薯粉好食喎, 我都未食過, 梗係要試下啦.
我地懶醒咁叫咗四種唔同既配料, 腐皮卷, 醬爆丸, 魚腐同蟹粉魚蛋, 諗住撈亂食. 點知, 又唔記得影相, 就交換咗禮物啦....
所以碗野既賣相已經俾我地催殘咗
是但啦, 你地睇到咪算咯, 呢d透明既, 就係紅薯粉啦, 計我話呢: 即係偏咗既粉絲咁上下啦
坐到下午茶時間添, 睇過有乜食先... 個菜遠鮮菰炆伊麵, 爸爸都食得喎. $28, 仲抵過我地個餐.
下一站, 就係去花園街同Bibi買返學襪, 咁唔整返半打白襪同兩對灰長襪又真係對唔住自己啦. 買完, 即閃, 我地操去SSP!
經過始創中心, 點都要去探下乜太個格仔既, 唉, 佢取價都算公道, 但貨物太多, 疊埋晒, 冇可能知道果d一袋袋小配件係乜添! 連字都睇唔到! 幾蚊雞生意走去煩d工作人員, 如果問完唔係自己想要果d東東又唔多好意思, 都係唔問啦, 叫做遊過就了啦. 呢間店面夠潮喎, 順便睇埋其他格仔, 有d格仔既貨物仲mark到鬼咁高, 阿草話同款既熊仔, 吉之島賣$19, 呢度就賣三四十蚊.
SSP其實冇咩啱我, 終於都有機會見識下德祥, 買咗餅幼絲帶同一套模具, 成為$26. 跟住阿草又去睇布, 買咗碼$15既布, 問佢諗住用黎做乜? 佢話買咗先算喎.
之後又睇下d絲帶同珠仔店, 我見到有我用開既兩寸粗雙面黑絲帶, 成廿幾蚊碼, 以我咁既身型, 一碼實唔夠縛蝴蝶啦, 咁咪要成四十蚊一條絲帶? 一於唔買, 反正我都有得用.
望過對面街, 見到Mimi提過既樹記喎! 我冇睇阿蘇既, 但都鍾意買枝竹同山根, Bibi至愛呀!
嘩! 乜咁多人排隊既? 又係呀蘇效應, 一個二個都話:多謝呀蘇啦!
你睇下我排到第幾位, 就知啦.
要咗兩包山根, 兩包枝竹同四兩腐竹, 成為$39, 好大包, 我係攞正排師奶黎, 唔介意拎住d咁野四行既, 有手信帶返屋企,好開心呀!
買完野, 坐隧巴去銅鑼灣, 順便去視察一間係禮頓道既樓上Cafe, 同木球會真係一街之遙咋喎.
不過, 未去過既多數都唔知定, 因為行過樓下都唔會知樓上有間咁野, 係對面街會見到樓上落地玻璃同靠窗既波波燈飾.
因為樓下大門裝咗鋼閘, 要按餐廳專用的門鈴, 先有人開閘架.
食完野, 坐巴士返屯門, 返到去都十點幾lu, 爸爸煮咗黑米麥片, 但煮咗出黎既效果竟然似紫米露喎! 又而又快又好味, 我專登扮到好似要霸住黎食咁, 氹到佢幾開心呀!
咁呢款又平又快靚正既甜品, 係幾值得推介既, 食落一d都冇麥片feel架. 下次佢再煮, 我先影俾大家研究下.
沒有留言:
張貼留言