印仔七十八 - 篆刻 II

呢個咩字呀?

鼻？啱啦！做咩雕個咁字？

啱至奇呀！

係三個字黎，係印篆既自由人至真呀！佢地最易寫啦，所以係我寫既第一個稿黎．

冇架，心裏面諗起咩咪雕咩咯，好隨意，咁樣做手作先會開心架麻．

就送俾愛自由又愛搞搞震既你啦！

爸爸煮的午餐

爸爸食素幾年啦，為咗就佢，我同Bibi都差唔多要食埋素咁滯．有時佢亂咁煮，我地都要照食架啦．輪到佢掌廚既話，出現係飯檯上最多既菜式就係大雜燴啦，即係乜都炒埋一碟上檯！

佢煮既野，有時都唔係常人可以接受得到架．所以呢，我地屋企有句野成日講既：只要懂得感恩，就好食架啦！

如果人地問到ｄ野好唔好食，但ｄ野好難食，點答好呢？

我通常會話：要好感恩先食得落咯！

今次既組合，有少少騎哩，蕃茄、金菰、生根、枝竹、迷你薯仔。係呀，屋企冇菜係度，是但啦．配埋糙米紅米飯，就係我地既晚餐兼我第二日既午餐啦．

點解我話騎哩呢？是關佢煮野係冇乜譜既，生根先出水，有做到，ｏｋ！

枝竹咩？呢條係全場最腍架啦，其餘既都係又硬又un既，佢話鍾意咁煮喎：你地食唔到仲好，留返我食！死雞撐飯蓋就係咁架啦．

至於金菰咯喎，駛唔駛一次放兩大包吖？好似煮緊炒米咁呀！

至於薯仔呢，成日叫佢要切開ｄ薯仔先好煮，如果唔係就晒柴火兼煮唔透．第一日有聽架，第二日又照犯，所以呢．．．上檯之後，大部份既薯仔仲係硬崛崛既！點食呢？唔知大家仲記唔記得佢煮既QK三色蛋呢？呢隻薯仔簡直就有異曲同工之妙呀！！！

我：嘩！你又唔切開ｄ薯仔黎煮啦！

爸爸：我想試下咁煮得唔得之麻．

我：你試咗好多次架啦喎，明知唔得架啦．

爸爸：車！係你嘴尖之麻！

呢ｄ就係糙米紅米飯啦，我地好多時都係咁蒸飯黎食既，有時加埋ｄ紫色既糯米粟一齊蒸，口感仲好呀．

至於咁樣食係咪就叫健康呢？

點都好過飯街外既飯盒既，又唔駛出街，已經好唔錯啦．

印仔七十七 - 篆刻 I

好似好耐都冇拎起過筆刀啦，自從做咗一大批印仔去義賣之後，都冇再開過工啦．一來市面已經冇我用開既擦膠既貨源啦，二來擦膠存貨唔多，要試既野都叫做試過啦，三來呢，我仲雕咗一ｄ存貨係度，可以隨時拎黎用，四來呢．．．．咪因為自己懶咯！

呀！係啦，咪係又要趕聖誕，新年同母親節既禮物咯！仲有果百幾張義賣卡呢．．．．

係喎！我都唔算好懶咋喎！

今次，玩返印仔，又要做ｄ唔同既野啦．我做咗資料搜集半年架啦，你估我講呀？真係睇唔少書法既參考資料架．

第一次玩篆刻，都係搵個易做ｄ架啦．突然間，心裏面彈咗四個字出黎－－天作之合呀！（貪佢ｄ字夠淺呀！）

哎吔，呢幾個字點寫架？等我查下篆刻字典先呀嗄．．．

當日人地硬塞呢本啞老師俾我，今日終於都有用武之地啦！

刻字呢家野呢，每人手勢唔同，只要唔係太離譜，基本上肥ｄ瘦ｄ，人地都唔可以投訴既．

而且按壓力度大細都會影響印出來既效果，我考慮過好唔好專登整崩個方框，等佢似ｄ印章feel架，後尾我都係求其搵條邊整幼ｄ，咁印出黎既效果就會好自然架啦．

呢種字體叫印篆，其實呢．．．如果冇查字典，我只係識得個合子架咋！

再執靚仔ｄ個天字，交貨！

街上派的試用品

食完早餐返公司，順手取報紙，發現多了一些女孩在派手作材料，等我都拎返張先．

原來係女性衛生用品來的，附在趣緻手工紙上．

砌好啦，都幾可愛吖．

咩動物黎架？駝馬？隻疑似綿羊既東東，似豬多ｄ喎！

呢舊立方體顏色都幾鮮艷架，就擺佢幾日啦．

個盒仔同ｄ紙可能第日有用都未定！

熱檸水？係咪得架？

成日都聽到人話：日日一早飲杯熱檸水，可以改善身體既酸鹼度，係一個保健良方．

孤勿論呢招掂唔掂，但原本飲開奶茶咖啡既，就算你一向唔放糖，熱量點都大過一杯淨檸水掛？咁即係話，如果你改行飲呢ｄ，起碼都放少咗卡路里入個肚啦．對於想修身既人士，未為不可既．

夏天都到啦，麒麟臂又要出黎獻世．我俾人踢一踢，終於都走去街市買檸檬啦．想懶ｄ去超市既，又驚佢ｄ貨唔靚，買唔落手．咁唯有行遠ｄ啦！

八點零鐘，中環既街市好多都未開，我唯有一直行上ｄ，又再行上ｄ；終於都搵到一檔有檸檬賣架啦．嗄？十蚊五隻？咁多點搞呀？既然青檸都係咁多錢，不如益下ｄ同事，整兩粒青檸佢玩下啦．

沖咗啦，我21/4開始呢個行動既，由朝早到放工咁滯，都係度飲檸檬水．

我就最唔鍾意ｄ熱野凍晒先黎飲既，所以佢一暖咗，我就咕咕聲飲晒成杯，跟住又加水，晏ｄ再飲過．試驗初步結果就係：呢幾片野，沖到第三杯都仍然係有味既．

係咪飲咗ｄ皮膚會滑ｄ呢？係咪因為檸檬會美白去斑呢？

有樣野係一定既：飲咁多水，就自然去得殊殊多啦，咁成日排毒，皮膚冇改善至奇呀！

每日一餅 - 你有試過嗎?

係惠康見過呢隻餅好多次，每次見到都當佢透明。夾心餅之麻，四蚊一包，冇咩特別唧。

見有小朋友食咗，係網誌度介紹出黎，應該都唔太差咋喎。

有日又再去惠康買生果，見到佢地仲棟晒係度，等緊我。望多眼：$4一包，加$1多一包；咁咪即係$2.5一包？

佢地係度呼喚我呀：試下啦！買我返去啦！我地都唔係咁差架咋！

咁好啦，就帶兩件走啦。

下午，開一包出黎，咬一啖。

咦！真係唔差喎，餅質仲好鬆化添！又唔太甜，淡淡既甜味，連我隔離位果個唔鍾意甜食既姐姐仔都冇投訴喎！

好，以咁既價錢，我俾個Good你！

它來自上海

因工作關係，認識了一些同行．慢慢接觸多了，就成為朋友．

今回，朋友到上海一遊，送我一盒什錦酥．

依家國內野都講包裝咯.

花生，杏仁，黑芝麻核桃；咦！板栗？前述幾種，唔食都估到咩味啦，板栗咯喎，真係未試過喎．

即刻拆一盒黎食先．．．唔，不太甜，至於栗子味咯喎，都唔多覺喎．但係，就比同事去完北京帶回來的好得多啦！

噢！原來有五款味道架，數漏了綠豆添！

我當然有請我老闆食啦，真係對唔住啦嬸嬸，佢又食到一身都係啦，麻煩你同佢吸塵果陣吸清ｄ啦！

榴槤朱古力

一向對榴槤都冇乜好感既，尤其係榴槤糕，自己唔食,淨聽人講都知難頂啦！爸爸話：要好感恩先食得落喎．

後來，又出咗粉綠色既榴槤糖，我俾過我老闆食啦，我俾咩佢都即刻食既，但果次佢一放咗入口，我先問佢知唔知自己食緊乜？係榴槤糖呀!

老闆：嗄．．．．．

面都青埋，好啦，俾你lur咯．

但係，受過咁既教訓之後，佢都仍然係唔識死既，又再俾咩都食啦．

今次呢，有同事去完旅行帶咗盒榴槤朱古力返黎，我見到之後，就問下食過既同事佢係咩味既？

同事：好味咯！

嗄．．．．唔係好靠得住喎，咁同榴槤糕咩分別吖？

佢話，榴槤糕難食，呢粒就好食，等我示範一下，食粒俾你睇啦．

見佢咁enjoy，另一邊既同事又拎粒黎食，仲咬開俾我睇下入面，佢話裏面係creamy既．咦，又唔係太差咋喎，好，等我拎粒返屋企，切開幾份，同Bibi一齊見識下先．

同事 : 駛唔駛咁誇呀? 仲要切? 成粒食啦!

成盒野，有好幾款形狀既，我揀咗呢粒，方便切吖麻．原本呢朵花有九瓣既, 切三份, 一家三口一齊食就最啱啦.

爸爸開工喎, 咁切開一半算啦，入面真係有餡架喎，食半粒咁多? 都係咪啦, 再切一半啦....拮起一粒，戰戰兢兢咁放入口，我覺得呢．．．．有ｄ好似蒜頭味咁．．．

食落呢，又真係有榴槤味．我問Bibi，你覺得點呀？

Bibi：有ｄ難頂咯，咩味黎架？

我：咪榴槤咯．

Bibi：唔怪得啦（跟住走去飲水），一日都係你啦，俾ｄ咁難食既野我食，搞到我喉嚨唔知點咁．．．

呢盒東西好貴架，我地自己一定唔會買黎試，今次咪叫做見識下咯．

我就只係食咗四份一粒唧，因為爸爸去咗開工(免疫)，所以其餘既都係Bibi一個鯁埋既，辛苦佢咯．

等我煮返d鮮茄蘑菰肉碎通粉俾你朗口呀嗄!

Sweet Sweet 的感覺 XXXII - To 嘉樂

無意中，係ｄ舊相度搵到呢個蛋糕，都好幾年咯，想當年我姨甥仔仲係小學生，佢果陣又好鍾意軍曹既，所以我就做咗呢個蛋糕俾佢啦．

我好懶，只係簡簡單單咁用咗菠蘿片同奇異果片就交差啦．小朋友即係小朋友，佢一ｄ投訴都冇，仲好佩服我呢個呀姨添！

係呀，我認呀！又一個呃細路既例子吖嘛！

爸爸：Bibi真係我既囡囡黎架！後記：PG家長指引

大家都知上次Bibi捉咗ｄ甲蟲，話要第日拎返學校既．

唔捉都捉咗咯，咁我只好千叮萬囑，叫佢記住帶走晒佢地呀！

唉～～，終於呢．．．爸爸真係第二日又捉咗好多甲蟲返黎呀！！！

爸爸：一日都係Bibi啦，如果唔係佢，我又點會真係捉D甲蟲返黎吖．其實我見到佢地好耐架啦，想捉返黎，驚俾你鬧，就係見到Bibi捉咗返黎，橫掂都係啦，咪整ｄ返黎玩下咯．

原以為爸爸只係捉咗佢帶返黎既一堆甲蟲唧，點知．．．．

正在啃蕃薯中......

我放工返到屋企，見到兩父女係度打眼色，都知有景轟架啦．我係廚房出黎，見到門邊有隻甲蟲爬爬下，乜會有隻野係地既？

初初爸爸仲死口話隻野係外面飛入黎架，四層樓先到平台喎，然後先到住宅，又邊得咁橋，隻甲蟲會由第一座飛到第十座搵我地呢主好人家吖．．．

跟住，爸爸好似自首咁，拎咗佢呢日既獵物出黎，一共有廿六隻！

咁都算啦，我都冇追究啦．點知．．．．．

食完晚飯，爸爸又係度玩緊蟲蟲，Bibi就做緊功課，我就背住佢地係度上網．

突然，Bibi大叫，仲起埋身跑開添！原來有隻會飛既甲蟲係度飛緊，我到呢一刻先知呢ｄ東東原來真係會飛架！

然後，爸爸就叫Bibi招供啦．

Bibi：其實呢，我琴日係捉咗十八隻甲蟲既，我地咪放咗係個玻璃兜度既，用個袋罩住．今朝我起身果陣，個兜入面得返八隻咋，而個袋呢就穿咗兩個窿．即係話，加埋頭先地下，同埋飛起果隻，仲有八隻未出返黎．．．

賣葛啦，我真係俾佢地嚇到喊咗出黎呀．．．

至於Bibi帶返學校果ｄ甲蟲呢，當然令到大家好興奮，尤其係生物科既老師添！

同學甲：佢地會唔會飛架？

同學乙：甲蟲梗係會飛啦！如果佢地一齊飛會點呢？

同學甲：咁快ｄ吸返個蓋啦，我接受唔到佢地飛起既樣呀．

我覺得．．．我開始有ｄ抑鬱症啦．．．

後話：

第二朝，Bibi食緊早餐果陣同我講：如果我地唔同你講，你咪唔駛咁驚咯．琴日我唔見咗十隻甲蟲，爸爸話點都唔好話你知架，如果唔係你都唔駛喊啦．

我：就係你地瞞我，我先唔開心呀，如果你地早講，我起碼有心理準備吖麻．琴晚我見到爸爸係度專登掉粒黑色Lego係我隔離檯上個兜度，我知佢又想嚇我，當又捉到一隻甲蟲之麻，慌你唔係都想咁玩媽媽呀？

Bibi：我冇呀！但係見到爸爸咁做，條橋又好似work喎！（陰陰嘴笑啦．．．）

Bibi：呢ｄ係甘蔗金龜呀，其實佢有好多品種既，我check埋佢既熟成期架啦，係四月，好吻合；幼蟲期係九月至三月．班入面都冇乜人啱呢個channel架咋，竟然有個平日成日話我變態既男仔，好開心咁同我一齊玩喎．

勢估唔到，Bibi呢輪咁忙，都仲會自己上網搵資料喎！咁算唔算通識呢？

到咗依家，我由驚，都俾佢地訓練到唔驚啦．見佢地食蕃薯，切開蘋果俾Bibi食，都留返個芯俾佢地歎．

真係估唔到個華盛頓蘋果芯咁重咁大，佢地都有能力集體托起佢，仲可以反轉再反轉咁堆黎堆去添！如果無無聊聊，望住佢地一輪，時間就會好快過架啦．

爸爸：Bibi真係我既囡囡黎架！PG家長指引

有日下晝，爸爸打黎：「隻豬真係有我既遺傳架，佢頭先放學返黎，放低咗個膠袋，入面裝咗好多甲蟲架。仲叫我唔好整死佢地喎，因為佢聽日要重要拎返學校架。」

牙膏的妙用

網上流傳一些牙膏的用處，現在同大家分享一下．一讀無妨，免得知識到用時方恨少呀。

衣領、袖口的汗漬，可用少許牙膏搓洗去除。
係咪真係得呢？我未試過，但一般白色果款牙膏係應該會減淡ｄ污漬既。

若衣物沾到油垢，以少許牙膏塗在上面，輕輕擦幾次，再用清水洗，便可除之。 我諗呢個應該得，因為我試過連唇膏都除到咯（可參考呢篇：怎麼除去唇膏漬?），咁普通油漬又點會唔得吖。

擦皮鞋時，將少許牙膏和在鞋油中擦拭，皮鞋更光亮。
係真唔係呀？不過依家都好少要擦鞋啦，而且用普通方法擦鞋，之後用布來回拖幾下，都夠晒令立立啦，駛乜搞咁多野呀？

清洗魚或吃大閘蟹後，手上總會留下難以去除的腥味兒，先用肥皂將手洗淨，再抹上牙膏反復搓擦，用清水洗淨後腥味兒就去除了。
呢下相信都得既，但用白醋去洗都得架。

牙膏可用來擦拭玻璃上的積垢，用布蘸牙膏擦拭，可擦得乾淨明亮。
這招係work既，不過呢，用潤膚露既效果都係差無幾架咋。

牙膏還可以去除瓷器污垢，搪瓷品的陳年積垢，用刷子蘸少許牙膏擦拭可除。搪瓷茶杯中留下的茶垢和咖啡漬，可在杯內壁塗上牙膏後反復擦洗，一會兒就可以光亮如初。
係就係咁講，但自從出咗神奇綿之後（可參考：神奇清潔棉），仲駛鬼咁搞咩！

電熨斗用久了，其底部會積一層鐵鏽。可在電熨斗斷電冷卻的情況下，在底部抹上少許牙膏，用乾淨軟布輕輕擦拭，即可將鐵鏽除去。
我細個果陣都試過，得得地啦。

水龍頭下方容易留下水鏽和水垢，塗上牙膏進行擦洗，很快就能清理乾淨。
呢招ok架。

銀器久置不用，表面會出現一層黑色的氧化層，只要用牙膏進行擦拭，即可變得銀白光亮。
可惜有時會太多隙縫，都幾難搞。

牙膏修復妙用

有車一族會發現車輛型號標識，經雨水侵蝕和長時間的灰塵沉積，會變得失去光澤，如果你用牙膏塗抹在車輛型號的標識上，過一小會用抹布擦拭可重現鍍烙的金屬光澤，此種方法同樣適用於車窗玻璃的劃痕。
我未洗過車，唔清楚。

牙膏可去除牆面字跡。如果有小朋友用鉛筆、蠟筆把牆面上畫得亂七八糟，只要用脫脂棉沾些牙膏，就可以輕而易舉地把牆壁上的蠟筆或鉛筆等字畫擦拭乾淨。
早知既話，當年歲零咁大既Bibi劃花道牆，就唔駛俾我省到立立令啦！

手表戴久了，表面會有一道道的輕微劃紋，使得表盤看起來渾濁不清，用少許牙膏塗於手表的蒙面，用軟布反復擦拭，即可將其細小的劃紋除去。
好，等我試下先。咦！得喎！

牙膏同樣可以抹平光盤碟面的劃道。用軟布蘸著少量牙膏在劃痕上慢慢摩擦，由裡向外劃圈，二十分鐘左右，盤面的劃痕變得淺多了。
咪住，咁會唔會影響到碟入面d資料架？仲要成廿分鐘？咪玩啦！

牙膏消炎妙用

牙膏中含有薄荷腦、丁香油、生薑油等成分，有消炎、止痛、化淤等功效。這個季節，蚊蟲、蜜蜂全體出動，萬一不小心被蜂蜇或蚊蟲叮咬後，奇痒難忍，塗上一點牙膏按摩一會兒，即能止痒消腫。
一時間冇粒蚊lan去測試添！你地睇下邊個試咗話我知啦。

夏天生了痱子後，在洗澡時，用少許牙膏在痱子多的部位進行搓洗，再用清水洗淨，連用幾次，能止癢消痱。
家陣咁多冷氣，仲邊有熱痱吖。除非係大汗豬既BB唧。

夏日人體容易發生皮癬，用清水將患處洗淨、擦乾，將牙膏塗抹患處，對治療皮癬很有幫助。
呢樣野又係要搵人去測試先得啦。

牙膏還能治腳氣。每天洗腳後，擠少量牙膏塗抹在腳氣部位，堅持一段時間後，脫皮、水腫、奇癬的現象就會消失，腳氣即可痊愈。
有冇咁神奇呀？係咪因為清潔得多先搞掂咋？腳氣既成因可能係因為身體缺乏某ｄ營養咋喎．

此外，更聽說有人用牙膏醫暗瘡，甚至有人以牙膏敷臉，去除黑頭！
我細個果陣，早就試過，係唔得既，尤其依家d牙膏成份咁雜，分分鐘衰多二錢重呀！

附錄：牙膏──旅行必備（呢d我就唔敢隨便辯駁啦，因為去到survivor咁既階段呢，有得用，點都好過冇既。）

外出旅行牙膏是必備之物，因為它除了潔齒 外，還具有一些生活上的用途，可解除旅途上的不便。

一、當皮肉因外傷踫破時，可以在傷處塗上牙膏進行消炎、止血，然後再包扎上。作為臨時急救藥，以藥物牙膏效果顯著。

二、當被蜂蜇了時，可以在蜇咬處塗上牙膏，這樣就可以消除紅腫，因為蜂毒是酸性物，而牙膏屬弱鹼性，酸鹼堿中和就解毒了。

三、當被蚊叮、蟲咬後，奇癢難忍，只要在叮咬處塗上牙膏就可止癢。

四、旅途中發生頭痛、頭暈時，可在太陽穴塗上牙膏，因為牙膏中有薄荷腦、丁香油，可以鎮痛。

計我話：去旅行，不如帶枝阿婆香水－－白花油好過啦！大家都想旅途愉快架，簡單既藥物係必備既，咪咁懶啦．

話分兩頭，大家係做試驗既時候，都應該有智慧ｄ，咪人地話得，就亂咁試呀．大家都知家下ｄ牙膏成份幾咁複雜架啦，仲有多種顏色添！如果要用黎清潔既話，最好都係用返最原始果款白色牙膏好啦！

我的驕傲 - 鬼佬廣東版

祖兒唱既，大家聽得多啦，不如黎聽下鬼佬版吖拿：

http://www.youtube.com/watch?v=wm49mbQXAtQ

 

非洲紫羅蘭結果了！

公司很多同事都種非洲紫羅蘭，品種繁多，十根指頭數不清．

偶爾有同事浸了葉片繁殖，又半途而廢，我或許會收養過來，用果凍膠杯由黃豆大的葉仔種起．

可能我的位置燈光充足，植物生長快速，往往只是幼兒期，就已長出花苞．以我這個經常忘記澆水的人，終日等到人家葉子也變成軟腳蟹，才曉得去灑水．

奇蹟的是，灑過水後，葉子又再堅挺，花兒仍舊照開無誤．

Bibi隨筆 - 我家的蜂 (21/05/2004)

唔知大家有冇養蜜蜂既經驗呢？又或者有冇實地見過蜂巢入面係點既呢？

你地都知我屋企有個搞鬼爸爸架啦．．．佢真係乜都玩一餐架．

以下就係Bibi以前既一篇隨筆，提到呢次養蜂事件既，因為唔算係ｄ咩功課，所以我都冇要求佢ｄ字寫得好好，你地或者睇唔明都未定：

韓國零嘴

韓國食品節又黎啦！唔買下野點係我吖．．．

韓國麵食貴咗好多，尤其係我地幾鍾意食既薯仔麵，以前1kg都只係十幾蚊，舊年要廿幾我已經覺得好唔抵架啦，依家竟然要卅幾，罷買！

反而樂天既食品，就唔貴，呢款牛奶夾心朱古力，都只係$7.9唧．一個字，滑！但可惜我嗅覺同味覺都比較靈敏，我食得出包庄袋入面既紙兜既氣味呀，扣晒分添！

呢隻唔駛問呀貴，果仁喎，我梗鍾意啦！$10.9兩盒呀．

呢款都係有鹽粒既朱古力黎，叫做銀座果子焦糖朱古力，五個大洋一牌咋！

呢款朱古力百力滋就十蚊三盒，咁就梗冇係工展會買咁平架啦．而且，佢入面唔係錫紙袋，係膠袋包庄既．我個人認為呢，百力滋始終都係固力果好食ｄ既，樂天咩？佢中間果條餅乾唔係幾得呀，在我黎講，佢點算係百力滋唧？百力滋唔係咁味架！

呢款杏仁脆片就正咯，一盒有八件，獨立包庄，只係$9.9，但品質，味道同口感就有幾百蚊盒日本禮盒餅食既質素，後悔買得少，週末專登再去，都買唔到咯．

打開入面係咁既，同包庄盒面咁上下樣

入面就走樣啦，打開，ｄ朱古力漿唔係S形既，但實在係真正朱古力黎，所以比起普通忌廉正得多！如果大家去韓國旅行，不妨買呢隻餅餅黎做手信吖，唔錯架．

雞泡魚乾，有辣有唔辣，我呢包唔辣，但就有一兜仔辣醬奉送．雖然只係$10.9，都唔好味既．．．完全唔係我食開果ｄ日本雞泡魚乾既味道呀，又硬又冇味．．我食開果ｄ好厚身，比較鬆身，而且係有味道架．

都想買紫菜架，我鍾意有鹽粒係面果種，但Bibi唔係好食，而且又唔係好抵，所以冇買．

帶鬼飲茶去＠怡翠軒

週末，放工約咗印度婆婆兩母子同埋我老闆一齊去飲茶，今次我地去怡翠軒。

平日黎食飯，係冇乜點心既，但今日，真係意想不到咁多款式呀！我冇影到相呀，係佢地面前就費事做ｄ咁既怪異行為啦。

我當然俾咗一抽零食佢地做伴手禮啦，加埋一盒迷你朱古力做母親節禮物，夠晒識做啦掛！

婆婆亦都好有我心，帶咗盒黑加侖子茶俾我．

仲有佢親手做既潤唇膏添！

四個人，叫咗：

竹笙素粉果　$14.8　：我冇食，見到入面ｄ材料都琢得細細既，應該OK既

五柳炸雲吞　$14.8　：我冇食，ｄ鬼鍾意食熱氣野我先叫既

XO醬炒蘿蔔糕　$36：蘿蔔糕本身質感唔錯，面頭仲鋪咗ｄ韭菜同銀芽

水晶鮮蝦餃　$36　：味道同質感都好好

鮮蝦腐皮卷　$33　：意想不到地好

鮑魚滑燒賣　$38　：同一般燒賣差唔多，只係面頭多咗一粒鮑魚丁唧

鮑魚汁炆鳳爪　$38　：我老花見到鳳爪就剔，其實我地只係想食豉汁鳳爪，呢款對婆婆黎講，太硬。一碟有六隻，仲有ｄ花生添，終於我都係打包算啦．

荷香珍珠雞　$28　：一般水準啦

鮮蝦白菜餃　$28　：同蝦蛟咁上下，但只有三隻，所以都係差唔多錢唧

蠔皇叉燒包　$24　：好細個既叉燒包，包皮同餡既比例都好好

雞絲脆春卷　$17　：味道一般啦

脆皮燒腩仔　$48　：呢碟係全餐茶最抵食既，拎住$48去燒臘檔買到ｄ咩靚燒肉吖？但呢碟就係貨真價實既燒腩仔啦，正到極！

桂花龍鬚蛋散　$38　：蛋散大家都知咩味架啦，咪有少少糖膠同芝麻係面咯，但佢就加咗一大堆七彩既棉花糖絲係側邊，ｄ鬼又係鍾意既

茶錢　十三蚊位

兩枝青島啤酒

 

我去到，見俾咗門口果張四方細檯我地，已經唔係幾高興架啦，可能因為我ｄ朋友到先，洽佢地係鬼啦，鬼叫我最遲先出現咩。第一碟上檯既竟然係蛋散喎！有冇搞錯呀？果位侍應都知唔妥，問我介唔介意黎咗甜品先？我梗係話介意啦，佢就拎返入廚房啦。ｄ點心陸續上檯，張檯又咁細，你地都估到邊有位擺野吖。

佢地原則上有換碟服務既，我叫佢上埋碟蛋散之後，就有人幫我同我老闆換咗碟啦，另兩位仲食緊野，佢地唔換住都唔緊要。後來竟然要我逐一開口，佢地先識為婆婆同佢呀仔換碟。

埋單$593，下午茶黎講，都算貴啦。我上次同爸爸既同學仔去荃灣飲茶，十大一細，都唔駛五百蚊。