蛙宴 @ 北京樓

4/11, 又約埋幾位姊妹食飯, 今次去新世紀北京樓.

我最早到, 啪住碟青瓜先, 五個人, 侍者放低兩碟. 

想懶d架啦, 就咁叫個套餐就唔駛諗.

後尾諗下, 不如散叫仲好啦, 試多幾樣, 反正中環北京樓我都食過好多次, 大路野都係咁上下架啦. 

先黎醉雞, 蛙妹話上海朋友教佢去雜貨鋪用$14買枝醉滷(一枝搭150ml紹興酒), 浸五個鐘, 出黎既醉乜醉物就會好好味架啦. 

呢度既素鵝一向有水準, 好味道.

韭菜蛋餅, 同佢既餐牌出入太大啦, 入面得好少蛋.

小籠包皮薄, 以我咁高超既筷子功, 一夾就穿, 唔合格. 

我係俾餐牌幅相吸引, 先點呢味XO醬腸粉蝦球煲既, 原圖係牛河色既炒腸粉, 頂頭放咗蝦球, 面面有D XO醬既. 估唔到黎到係咁多醬汁既, 但味道好好, 又夠熱, 可惜油咗D.

呢碟醬爆雞粒, 份量相當, 抵食.

廚師推介既蟹粉扒豆腐, 杰撻撻生粉漿, 好油.

賽螃蟹, 唔錯, 亦冇成氹油.

宋嫂魚羮, 刀工細, 味道不過不失.

五個女子, 食咁多野, 都咪話冇食力呀.

多謝華姐既手信, 原來D零食薑盒背印有猛男既, 可能我時運高, 一直冇留意到.

多謝蛙妹既玻璃曲奇, 我俾咗Bibi拎走做茶點. 係呀, 冇人話大學生唔準帶茶點架!