快炒珍珠苦瓜

行勻成個蝴蝶村街市先決定買咩，睇到呢隻珍珠苦瓜，雖然Bibi唔食，爸爸又話涼，點忍得唔買吖? 十二個大洋，都值既。

切開見到有部份既瓤轉紅，即係種籽都夠成熟啦，所以就留起佢啦。未熟既種籽係較淺色既，睇下最底果粒做對比啦。

切果陣，我已經知道佢好爽脆，切丁丁粒放入口試食，竟然係唔苦架喎，只係有好微好微既甘味，爭D感覺唔到添。

咁就唔好客氣啦，食兩件，又留兩件切粒，加埋入晏D食既沙律度先。

剩低既就用黎搵肉碎炒。肉碎就好似平日咁用少少豉油、糖、鹽、幾滴酒調味啦，最後放少少粟粉拌勻就得啦。

豆豉浸佢兩分鐘後，用筷子係咁意督爛佢就得啦。

我唔食蒜頭既，但煮野會落，為咗容易揀返出黎，我通常用蒜片。俾個小貼士你地: 蒜頭係要切片/切碎之後，擺放十五分鐘，等佢既酵素發揮作用，先會更有益架。

我今次係用好快既速度去煮既，先用少少油去爆蒜片。

放入肉碎去炒

肉碎炒到半熟(少少轉色)之後，係中間挖個窿，又放少少油去爆香D豆豉。

跟手放埋D苦瓜

兜炒一下

加入小小水(約兩安士)，加少少魚露調味。

一路兜炒至再滾起，炒多一陣就打少少獻。

可以起菜啦，你地估都估到碟野只係煮咗一陣就煮好，真係快靚正架。

既然佢地唔食既，我就留黎做私伙餸啦。

真係超好食，送飯送粥都得架。

夜晚食沙律，d苦瓜真係好正，仲好食過青瓜!