比利時啤梨

大家知唔知依家比利時啤梨正係當造呢？

佢唔會好似澳洲啤梨咁肥大，外表長長咁，皮色又唔靚。

但優點就多啦！

１）佢夠清甜，又唔會甜到漏

２）佢肉質細滑，又唔會好似安琪梨咁，有時會粉粉地

３）水份充足，好熟既時候，亦唔會帶少少酸

４）佢夠細心，有幾細？除咗頂頂個粒樹枝外（即係講緊條莖），一路連落去都係食得既，係呀，中間原本既心只係生係近住啤梨底架咋，上面一大截既心都只係好似綿線咁幼既野，食埋都無妨。而有核既啤梨心咩，嗄！細到好似粒波子褀咁啦，如果你個啤梨夠熟，或者再細ｄ添。

我係好鍾意做實驗既，所以除咗等個啤梨熟咗先去食之外，都試下生生地既時候食下，睇下係咩感覺。咩叫生生地？即係人地開箱，你地見到枝莖仲係好青仲未變成柴枝既時候咯，但俾少少力按落去，都好似有少少淋咁咯。

我發現硬硬地去食，都唔太差喎。都甜既，咁就一定冇熟晒咁甜，又未至於話淡。咁未熟，個心會唔會大ｄ，少咗野食呀？

答案係唔會既！我仲專登咬入ｄ睇下添！咦，個心唔會酸架喎，一個唔覺意咬得入得滯，見到ｄ核添！

嘩，乜原來ｄ核咁細架？仲細過芝麻呀！好似一粒粒黑椒碎咁。

依家街市賣就會貴ｄ，大概五至七蚊一只啦，睇下你去邊個街市買啦。Three Sixty呢，就賣緊$12.9三只。

有機會係超市見到，就入貨啦謂！