今年公司選咗去新落成既尖沙咀Hyatt度搞閂埋門聖誕自助午餐，因為初初大家預咗頂晒籠好似上年咁叫到會，所以都有少少意外，仲有永不落空既抽獎添．
今次因為場地夠大，所以連家屬都可以參加，爸爸同Bibi都有一齊去．爸爸原本前一晚要開夜既，但驚自己第二日冇精神玩，所以就改咗星期五先開夜啦．
佢食素，自助餐定有啱食既野．不過，個傻佬第一碟，連生果同甜品都拎就有少少搞鬼啦．
甜品呢，我一ｄ都冇食到，呢ｄ係Bibi影既相．
聖誕甜品通常好睇唔好食，所以我一件都冇食．但因為有好多漿汁可以玩，Bibi就拎咗幾樣返黎．
嚴格黎講，我諗得Cheese Cake同焗牛油麵包布丁係好味既唧．
人出錢，我係唔會出命既，所以就先要一碗莧菜羮同豬仔包．
再黎清炒時蔬，涼拌木耳小黃瓜，雜菌蜜豆蝦仁，焗新薯，燒鴨，叉燒，香草魚柳．燒味併盆係有水準既，魚柳同炒雜菌就相當出色啦！尤其係呢幾條菜遠，簡直係驚喜．見唔見我都畢咗少少白飯呀？除咗燒味，其餘既就係我今餐主要拎既食物啦．
大獎就唔到我啦，但我就抽到六塊面膜，我地一家三口用兩次就玩完，易毀滅．但既然有兩盒，我都唔介意分一盒俾朋友，所以得返一盒．
另外，仲抽到一個榨汁機，我一見到就頭痕，乜咁大鑊呀，我地冇用喎，後尾見到老遠有人抽到個膠水樽，嘴都扁埋，我即刻同佢交換，佢就開心返，我又唔駛拎咁大件野走．另外仲有一個音樂咕臣，咁就放係公司用啦．
夜晚，我同爸爸跟手去朋友屋企打邊爐，Bibi就返港台開派對．大家都過咗一個愉快既晚上．
返到樓下商場，係七仔買完野，竟然俾我撞到小熊喎！上次blog聚大家話我地應該多咗機會撞到，我仲話唔會添！事關我地作息時間唔同，咁耐都未見過對方架．
屋企樓下平台既裝飾，都幾靚丫，影返相張先返上去啦．
沒有留言:
張貼留言