收穫

現代通訊發達，自從有咗電郵同msn之後，寄信既機會就少咗好多．

係呢度識咗咁多網友之後，間中都會收到大家寄黎既信件．

臨近聖誕，就會收到特別多郵件．呢ｄ就係係聖誕卡上剪落黎既郵票啦，我通常會儲埋成年先走去浸既．負責呢項工作既，當然係爸爸啦！但佢又老花，又唔識英文，所以叫佢分類都幾頭痕架．

通常見到個郵票崩咗，又或者接待處果位收信姐姐仔，監生同我用機氹咗個公司印上去個郵票度，就會有ｄ心痛．成個信封咁多位你都唔氹？好地地，做咩整花晒個郵票喎！

係呀，我仲有集郵架，都幾十年啦，係隨緣式既集郵，遇到咪收起佢咯，唔會刻意去買全新既郵票啦，就算買咗，都留返黎寄郵件俾朋友，等佢地收到開心下．我覺得收到特別款式既郵票係寧舍開心架．

我諗咁多郵票之中，多角形既郵票未算特別，最特別都係日本朋友寄黎既Hello媽咪郵票，成個郵票都係佢個頭形，夠晒特別啦．佢就夠醒啦，成個A4咁大既郵包，同我貼咗好多唔同款既細面額郵票上去寄俾我，未拆都已經識笑啦！個包裝就係禮物咯！

講開集郵，亦有段小插曲．話說我未嫁果陣，公司黎咗個好喜歡集郵既呀叔．當佢知道我都有儲開郵票既時候，就叫我帶ｄ郵票簿返去俾佢欣賞下．我果陣仲細，集郵既年資都係得十幾年唧，照計就冇咩好野係裏面既，但我都照抬到死死下咁，將果幾本大郵票簿拎返去俾佢睇．

呀叔睇完我ｄ郵票之後，就話：你ｄ郵票都冇咩特別，只係有一個梅蘭芳既郵票比較好，咁啱佢手上果套郵票就係爭咗呢個咁話．我都知呢個郵票係有ｄ歷史既，係一次偶然機會，移咗民既同學仔係屋企執ｄ舊信時剪出黎寄俾我架．當時，我二話不說，就抽咗佢出黎送咗俾呢位呀叔．

知道呢件事既人話我笨，做咩咁隨便就送俾人，話唔定個郵票係珍品黎．但君子有成人之美，郵票於我乃身外物，我多一個唔會多，少一個亦無妨，亦冇打算用郵票來投資或保值，只係純粹用黎欣賞下咁唧．

我送咗個郵票俾呀叔，佢老人家就滿心歡喜啦，咁有咩唔好呀？我叫得佢做呀叔，其實佢都唔細架啦，係退咗休再出黎做事果種黎，只不過佢當時比我老爸年輕，所以我先叫佢做呀叔唧．

我一向既認知，集郵係用黎怡情養性既．細個果陣，會用玻璃紙將自己覺得最靚既郵票包起先放入郵票薄架，係咪好傻呢嗄？