令人驚喜的美心餅店

自從戲院里間美心裝修咗之後，佢既麵包蛋糕都精美咗好多，一些特別款式既蛋糕，價錢亦比同系既連鎖餅店高好多．

從前午餐我偶爾都會在此買即做三文治，喜歡可以自選特式包同餐湯，佢既菠菜忌廉湯同周打蜆湯都幾夠濃架．

呢次，因為天雨，加上懶，想行少ｄ，又想食ｄ熱野，又唔想點駛排隊，就走黎呢度睇下午餐啱唔啱胃口啦．

咦！依家午市又獻新猶喎，有即做意粉餐，＄３２一客意粉＋餐湯．

主菜我選咗豬扒加煙肉，配菠菜忌廉汁．(佢地基本上提供三款汁俾你揀既：茄蓉汁，黑椒汁，菠菜汁)

唉吔，又俾我撈過黎添，你地睇唔到ｄ鬼佬豆芽同車厘茄原來既靚樣啦．

叉一箸入口．．．．乜咁鬼熱架！簡直開心到爆呀！意粉唔會太硬，又唔過籠，簡直啱啱好呀！咁既溫度，好多餐廳現場食都未必有呀．咁到底有幾熱？足可以令ｄ生勾勾既豆芽冇晒草青氣（我平日實揀開架，唔鍾意ｄ草青味），咁算唔算得吖？加埋ｄ咁好味既汁，又唔會太咸，正到暈呀！

冇諗過佢俾咁好既煙肉架，我仲以為係普通早餐既長條煙肉添！

無骨豬扒，軟滑夾好味道，一開二，都有成塊架！

咁個湯呢？哦，我揀咗周打蜆湯．

嗄．．．．．

唔覺唔覺，飲晒，唔記得影添！

我頭先有諗過影架，但又唔想未飲就洩咗佢度"真氣"吖麻，咪諗住食完ｄ意粉，一陣先影都未遲咯．

點知．．．對你地唔住咯！

P.S. 過幾日，又走去買黎食（想唔肥都幾難），我今次要蘑菰汁，唔想食雞，所以食返豬扒，又揀返煙肉（其實有得淨要豬扒既），味道都仍然過得去．但因為有心理準備，所以都冇乜驚喜ｌｕ．

今次得記影返杯湯過你地睇下啦！