想為媽媽預備一個母親節蛋糕嗎?

終於都趕好了今年的任務，為每個長輩級媽媽預備的母親節蛋糕已經順利完成，並陸續送出。

離母親節尚有一星期，再想想，似乎我還有餘力為社會再做一點事。或許，我可以為志願機構籌點善款呢！

若大家願意捐出不少於港幣一百元的話（善款當然多多益善啦），我樂意為你獻上一個手作粘土蛋糕。

因製作時間緊逼，為避免蛋糕在寄運途中損毀，認購者可以選擇於早上辦工時間前或午膳時間，到中環置地廣場當面交收。

認購善長需預備一張畫線支票，抬頭請註明「兒童癌病基金」或"Children's Cancer Foundation"，並於支票背面以正楷寫上聯絡人的姓名及電話，以便日後支票過數出現問題時，「兒童癌病基金」職員可直接與　閣下聯絡。懇請大家在支票戶口預備足夠款項，避免增加工作人員的負擔。

善款收集後，將一次過捐到「兒童癌病基金」。有關收條，我將會留為紀念，作為今年為自己預備的母親節禮物。

有興趣參與此次善舉的朋友，請以私人留言示意，當我與你交換聯絡方法，並發出正式認購編號後，才算作實。

在香港，兒童癌病是一歲以上兒童的第二號殺手，僅次於意外和中毒之後。大家都知道小孩子是媽媽的"心頭肉", 孩子有病痛, 媽媽就最身同應受, 所以這次母親節主題, 我亦摒棄我一向取用的奧比斯及無國界醫生, 揀選了兒童癌病基金.

我希望在此盡一點綿力，為病童的生命帶來點點光輝。

多謝支持, 所有蛋糕已一個不留, 製作材料亦已用罄, 本人謹此對向隅者致歉!

Cookies from Celia

果然高效率喎！即晚就做得成「阿茂」啦！

你咁有心專登整俾我食，仲話驚唔熟，食到我肚仔痛?

白老鼠就白老鼠啦，未驚過！要我等到返屋企先試就勢係假，即刻整件先！

係就係冇乜色，但都熟架啦。如果Bibi整成咁，我即刻拎去派街坊添呀。

好大陣牛油味，裏面仲有鬆化既合桃。唔太甜，好好喎！

俾你75分啦！俾得太高分就冇進步架啦。有個B啦今次，咁下次再整好ｄ等我又試下咯喎！

母親節續篇

做開呢款母親節蛋糕，越做越多，好似做極都滿足唔到d媽媽既需求咁。

我原則上一晚只可以做兩個，又要預備埋第二晚要用既芒果粒粒，所以速度都係咁上下啦。

昨晚就神勇啦，返到屋企煮咗簡單既晚餐：滷水排骨（返熱就得啦，事關我早上已經煮咗）、韭菜炒蛋、灼小棠菜膽，冇煮到飯，淥烏冬食咋。

食完搞掂晒ｄ野都只係八點，開工整蛋糕，一口氣做咗三個。Bibi問：「係咪好攰呢？」我仲估佢咁關心我添！原來佢想講：「你攰就可以抖抖，我呢？溫書溫到攰都要繼續呀！」衰人吖，講到自己懶係辛苦咁。

之前已經加加埋埋整咗十個，現在又多咗三個，仲爭五、六個睇怕都夠啦掛？即係話：如果我再努力多幾日，就可以達標啦！

雖然已經做到好悶，但係我越做越熟手，只會越做越靚仔，唔諗住轉款啦，唔係一陣ｄ姨媽姑姐一比較起上黎，我就周身都唔得掂啦。最好就係大家都一樣樣，只係牌上既字唔同唧。

食餃子啦!

今朝一早起身，玩咗一粒鐘印仔，就同Bibi落樓下食早餐。跟住就一個返屋企做練習，一個去街市巡下。

想包下餃子，一早就浸咗冬菰、蝦乾、木耳。買咗豬肉、韭菜、小棠菜、圓餃皮，打道回府。

其實簡簡單單既韭菜、豬肉、冬菰加蝦乾已經好惹味架啦，但因為有隻素食動物係屋企，都要就下佢架。所以就會有木耳、素雞丁、小棠菜、粟米之類既配料啦。我今次想秘密加d料落去，唔知會唔會食到爸爸依牙鬆gon呢？算啦，都係咪制啦，一陣又話食到佢嘴歪呀。

預咗十零隻韭菜餃俾叔叔，又特製咗一碗配方俾大肚姨姨食，諗住佢昨日話現買既日式餃子太咸，專登整俾佢食既。點知後尾佢話屋企仲有餃子係度，唔要啦。

咁就等我地哽埋佢啦。

咦！原來呢碗特製料仲正，我用咗新方法處理小棠菜，加埋木耳、冬菰、豬肉，仲好味過我地果ｄ韭菜餃，大家一路食，一路話正。爸爸雖然冇食到，見到我地咁enjoy，都話：「今次姨姨走寶啦～！」

Bibi都幾喜歡脆脆既口感，所以我都要煎燶少少。

印仔三十一 - 芭蕾舞 II

今次呢個芭蕾舞女郎，比較健碩，事關係對住真人黎畫既。

 

我實行發揮「妙手仁心」既本領，略為幫佢隻燒鵝脾抽咗少少脂。大家都知跳芭蕾舞叻既，小腿都有返咁上下架啦。

 

就在Bibi做A-Maths加對答案果三粒鐘裏面，我只係雕好呢個印加埋另一個文字印既初稿咋。以我既hourly rate，計落條數，其實去PaperArt買個靚靚印仔，真係一d都唔貴架啦。

冇咩特別理由，送野俾朋友唔一定要搵藉口既。雖然我地從來未見過面，畫好個圖，想搵人認頭，咁啱諗起佢個名，咪刻落去咯。

希望準物主唔會嫌我手工粗淺，好好利用佢啦！

做咩又冇衫著既？咁人地未有能力整埋條紗裙吖麻，收住貨先啦，咁先有進步空間麻！

係啦，如果大家想買印台，可以去電車路，環球大廈斜對面，紅十字會捐血站下面果間紙品天地買架．

甜頭！

乖乖不得了！今天收到珍妮仔整既鳳梨卷呀！

果然係甜頭呀嗄！

點等到返屋企至試呀？偷食幾件先啦，就下角度去影相，唔多覺既！

哼～，唔太甜，又食到菠蘿餡既味，睇怕樽野都過唔到今晚架啦。

再食多件得唔得呢？咁會唔夠數充掙場面架喎。

有計！睇下公司有冇人有相機係度先，咁就唔怕返到屋企得返幾粒，幅相唔靚啦。

Sweet Sweet的感覺 XIV - 母親節蛋糕

同大家上完堂，仲有少少搓咗芒果色既粘土剩。俾佢地催殘過，有少少乾，唔好晒，等我用埋佢。

咁既然母親節就快到啦，咪用埋ｄ粘土做母親節蛋糕啦。又整佢地果款芒果蛋糕？唔好啦掛，人地唔厭，我都厭啦！

好，就整芒果蓉蛋糕啦，等我切定ｄ芒果粒先，順便可以氹下我ｄ家姐高興。做個最簡單既忌廉蛋糕底，加埋ｄ忌廉圍邊先。好，再用少少芒果醬撈埋ｄ芒果粒粒，放上蛋糕面，加返個牌就大功告成！

黎一幅合照先：

想話做多d出黎架，但一晚只可以做到兩個，唔想搞到冇節制咁夜一夜都唔訓呀！

仲未夠數架呢度，革命尚未成功，同志仍須努力！

插牡丹

星期日行過置樂花園，見佢有牡丹賣，二十蚊一束，圓波波咁，幾得意，就買咗一束啦。花檔姨姨話：「唔好心急，要等幾日至開既。千其唔好向ｄ花噴水喎！」
咁即係話花瓣唔濕得水啦，收到！

不如拎返公司插啦。咁我返到屋企就唔拆啦，成束用抽濕機度倒出黎既水黎浸，第二朝居然開咗一朵喎！

可能焗咗成晚，屈住，ｄ葉唔靚啦。返公司用花樽插開佢，下午又開一朵。
星期二下午，又有一朵爆開咗，但ｄ葉仲係縐縐地。

原來外面包住圓波波既花瓣會反落黎架，裏面果ｄ鋸齒邊花瓣會再開晒架．

所謂牡丹雖好，都要綠葉扶持吖麻，咁ｄ葉咁唔爭氣點算呀？
樣衰ｄ就樣衰ｄ啦，唔通剪走晒佢咩？

網友禮

這是網友Corina遊泰後帶回給我的手信，清清爽爽的潤手霜。

牌子我可不懂呢，但主要成份是Starfruit & Star Gooseberry。

一塗上手，立時清爽，會不會如標籤上所述：令雙手保持滑溜、柔軟及年輕就未敢肯定。但塗抹後手部不會邋粢粢就真既，而且味道清新，遊泰時不妨考慮試試這產品。
就等我親自演譯啦，幾呀歲，係時候保養下咯！

接住，係Candyjai做俾我既波板糖，係咪幾得意呢？襯晒我張揮春呀！

爸爸的童年回憶 - 要PG家長指引先好睇

復活節假期，爸爸呃咗我入元朗，話去發記食粥，其實就係想去樓上鋪果ｄ爬蟲店睇下有冇蠶蟲賣。
爸爸：「請問有冇蠶蟲賣呀？」
店主：「有！呢，呢度。」
笑瓜，原來係用黎餵雀既蠶蟲乾！
皇天不負有心爸，終於都俾佢係金魚街買到，重溫佢既童年回憶。十蚊先得三大條架咋！

三軍未動，糧草先行。其實佢一早就睇中屋企附近露天停車場有棵野生桑樹架啦，但佢話驚突然間棵樹俾人斬咗咁點算喎，所以每次搭車都專登四圍睇下邊度仲有桑葉可以摘，同埋睇定元朗邊ｄ婆婆會拎桑葉出黎賣（對我地就唔慌會咁細心啦）。係咯喎，咁好死咯喎，陪我入元朗食粥！

係幾日間，ｄ蠶蟲越食越肥，仲放低好多黑金添！好彩呢ｄ野唔駛我郁手處理既唧。爸爸將佢地養係個砵度，仲有個大膠箱裝住，日日同佢地換片，唔會搔擾到我地既既。

據（己自話己自）養蠶專家爸爸話：當蠶蟲想結繭既時候，佢個身會變成黃黃地色，好似呢條咁，先會排毒，排出深綠色既便便，然後會排出冇咁深綠色既便便，後來又排出啡色既便便，最後呢，就排出多餘既水分，就當佢係尿尿啦（平日佢地係唔會小便便既）！咁先會安安樂樂結繭架！

吐絲中

結繭中

呢個繭幾靚仔

大概一星期，蟲寶寶差唔多結晒繭啦，仲爭一條唧（我地俾咗個有機蛋既紙盒佢地暫住）。於是，爸爸就由得佢自己爬晒枝桑葉枝，任得佢豪食啦。

最尾呢條蠶蟲就威啦，爸爸仲整咗個韆鞦俾佢玩添！終於佢就係呢個架上面結咗繭啦！

Bibi仲話尼幅相似昆蟲圖鑑呀！氹得爸爸幾開心呀！

我就煩死啦，唔知幾時ｄ蠶蛾又破繭而出，交配之後又再生出一大堆蠶蟲，爸爸就有排玩啦。
天氣會一路熱落去，睇怕爸爸都會繼續玩架咋啦。
唉～

P.S. 如果有常識科老師需要呢ｄ圖片既話，歡迎留言問爸爸借相，佢會好樂意同小朋友分享佢既童年樂趣既！

印仔三十 – 迷你熊貓

海洋公園又有新成員，帶協埋幾隻熊貓都可以增加出鏡率。
驟眼一睇，其實熊貓都幾可愛吖，不如就做一隻迷你版既印仔睇下啦。

相對我第一次做既熊貓印，呢個就真係進步好多啦。由唔知頭唔知路，膽粗粗整黎送俾人(仲夠膽送俾人, 好彩對方冇投訴咋!)，到依家都叫做知道點落刀，亦都可以操控自如啦，都花咗唔少心力先做得到架！

果陣連要先整乾淨d鉛筆痕先去加顏色都唔知呀!

雖然只係短短兩個月既速成學習過程，我都冇話學人一步登天架，都有乖乖地日日練，就好似我當初學做麵粉花一樣，縱使係最基本既功夫，都盡量多練習，我就唔信做佢唔好啦。加埋自己既想像力，一定會做出興別不同既作品既。
嗄？學人講「作品」添？係呀，呢ｄ叫老鼠跌落天秤吖麻！

手作聚

18/4，是我跟網友的首次手作聚，同時亦跟第八至十位網友（Mabel, Eunice及Mimi）跟我碰面。

下班後，大家先吃過下午茶，一行人便殺上師奶的家開始我們的「真假蛋糕聚」。

先來做兩個凍餅：芒果慕司及士多啤梨芝士凍餅。雖不用焗爐去做餅底，但若家中沒有打蛋器，就算所有材料備妥，都是一項艱鉅的工程。難怪當年爸爸跟Bibi靠著兩對筷子，兩父女努力了一個下午才做出一個黑糖芝士凍餅。

多得Pri山長水遠，為大家帶來工具及打蛋器，讓我們體驗做蛋糕的樂趣。真心講句：「沒有幫工的情況下，這項廚藝對我仍有點複雜，看來日後還是由專家代勞吧。」突然很感恩可以只做個張口便吃的人！

擾攘一輪，花了兩小時，讓兩個凍餅乖乖到冰箱睡大覺。執拾好檯面，又到做贗貨蛋糕上場。

因為大家都沒有接獨粘土的經驗，所以來個最易處理的芒果蛋糕。

有人渴望親手製作士多啤梨，我亦順應民意，由得她們苦幹一番。當大家發現原來要即時做出數顆士多啤梨要花上一小時後，都有點咋舌。但總算在努力下，順利完成。

接著，又動手做較易的做的芒果卷。

我約略講解之後，大家就開始做蛋糕的內膽及包著蛋糕的芒果片，完成後，放上芒果卷、加上忌廉、士多啤梨及蛋糕牌，再塗上光油，大功告成。

 

看看時鐘，剛好花了三小時才全部完成這做迷你蛋糕。原來打算送給媽媽的母親節禮物，又開始捨不得送人。可幸大家仍覺得這數小時花得值，亦沒抱怨我不肯出手幫忙。因為事前我已約法三章，每個步驟都要她們自己動手去做，一依賴就失去了意義。我亦樂得講解完畢，就跑去歎茶吃餅，小休片刻，只用眼尾輕瞄誰人出了亂子，提點她撥亂修正。

八時多，大家一起吃外賣薄餅作晚餐。原打算九時多散會的，但師奶又捧了私人珍藏的各式打孔器出來給大家試玩（很喜歡花邊打孔器，但這些玩物實在太昂貴了，還是莽想等收到再下一回的稿費才打算吧）。又多留了一小時才踏上歸途。

全日所費無幾，郤過了充實的大半天。

哈哈！上次Cornia送我曲奇的盒子，又派上場，實行又食又拎啦喂！