印仔二十二 - 史納莎 to Rachael

打算做一個多產既人，所以不斷係度雕印仔，除咗想快ｄ進步之外（可能係揠苗助長），仲想為大家帶黎多ｄ歡樂。

今次呢個印仔呢，係送俾我老闆一個好朋友R先生既囡囡既。

講起呢個傻鬼佬，咁啱果日佢上黎開會，黎我地公司途中，佢秘書話咗俾佢聽我又玩緊新野，於是佢一見到我，就即刻問我可唔可以俾ｄ新野佢先睹為快。

既然佢咁欣賞咯，就應承整一個俾佢囡囡啦。

我問過R先生佢既囡囡鍾意貓定狗，佢話囡囡鍾意狗，佢地屋企都養咗兩只狗。但因為佢上黎我公司係做正經野既，所以就唔方便講咁多野啦。

事後，我問R先生秘書，睇下佢知唔知R先生屋企果兩只係咩狗，等我決定個印仔咩樣。原來佢屋企養既係蝴蝶犬同史納莎。

做過少少research，蝴蝶犬有長毛既，又唔似我係M記換返黎既大頭狗咕臣喎。都係整史納莎啦，好似可愛ｄ。

呢個就係我既最新設計啦，原本想整個影既，但如果只係得個影，又好似好簡陋咁，於是就同佢加返少少細節啦。

期望Rachael收到印仔時會好開心，一家人都可以過一個愉快既復活節。