輕鬆星期天

星期日，Bibi七點半就起身，我hea多一陣先起床。咪咪麼麼又九點幾先出到門口，今次試下坐巴士去西鐵屯門站，轉西鐵去元朗，再係輕鐵元朗總站坐一個站去大棠站落車行去發記食粥。點解要咁做呢？明明可以就咁係樓下坐一程輕鐵就去到大棠站既，車程大概要大半個鐘啦，不過今朝見輕鐵都冇乜位，我地又唔趕時間，不如揀個舒服ｄ既旅程啦。

連埋等車，差唔多用咗成粒鐘先去到大棠站。但發現咗一樣野，就係坐咗咁多程車，車費反而仲平！點解？

因為，用八達通坐第一程輕鐵（$3.7）；第二程西鐵原本要收$5既，但因為有轉乘優惠（當之前果程車係接駁車）就可以扣返之前果程車費，所以實收$1.3；第三程輕鐵原來都係唔駛錢架！所以全程只係用咗$5，仲可以有座位，舒服好多。而輕鐵呢，由我屋企到大棠站就要收全費$5.8啦。我諗好多人唔知有呢個轉乘優惠，同接駁巴士係免費既。

行去發記途中，爸爸見我頭噩噩：「做咩呀你？」

「我想認下ｄ路麻。」

「認路？你慳ｄ啦。」

「唔好話你專登次次帶我黎都行唔同既路，兜黎兜去，搞到我認唔到之麻。」

係發記，想話唔食豬膶架啦，但又忍唔住叫咗，再加埋爸爸既白粥、齋腸同炒麵，成為$38。我今次醒啦，影到碟靚靚炒麵俾大家睇啦，新鮮炒起係唔同ｄ既。

去十蚊店冇乜買野咋，好克制，只係買咗十件貨。

見唔見呢ｄ保護椅腳既膠墊套仔呢？佢地有2.1cm大既，係我眼中，佢地就變成我既花盆仔架啦！

因為雪櫃已經有好多食物，所以我係街市只買咗紅蘿蔔仔、魚肉燒賣同魚蛋唧。但大同餅家既芝麻餅都值得encore既。

我又係禾采買咗ｄ蛋糕兜仔同粘貼袋，真係幾抵。

坐返輕鐵返屋企只係一點零，仲有大把時間。整咗魚蛋烏冬俾Bibi食，我就入房覺覺豬啦喂！真係爽呀，我有訓著過架。