潮式嫁女餅

昨日，有同事出街食飯，打電話返黎話去咗ABC餅屋喎，問我要唔要買野？醒得佢吖，咁就要咗兩個雞尾包同一盒鳥結糖啦。
D野一拎返黎，我就先食咗一個雞尾包，真係幾好味。我以前係唔會自願食雞尾包既，自從食過呢間既出品，先至會試下買其他老店既雞尾包黎比較一下。講到甜度，都係呢間最適中，唔會太甜，太漏，而且凍咗都好味。另外果個，諗住俾我老闆見識下既，睇怕佢咁大個仔都未食過雞尾包掛？
我習慣每日要佢係公司食一個生果既，咁下晝又俾蕉佢食，又整咗兩件潮州嫁女餅俾佢歎，睇怕都係唔好晒料啦。原本D嫁女餅係我地一人一件既，因為我知係勁甜既，我一路都冇勇氣食。我隔離位就唔老醒啦，一啖噬落去先識後悔，牙都軟埋。
咁啱咯，鬼叫我老闆做錯野呀！果頭叫我取消個拆骨Booking，話自己五點幾有事，我打完電話同人講話取消，跟住入房睇下佢五點幾去邊，點知佢本pocket diary係冇野既。再問佢究竟你約咗咩人，點解我唔知既？原來佢記錯咗，要佢去既立法會會議係星期四，唔係星期三呀！又要我再打電話俾人話去得，咪罰佢食埋我果件嫁女餅咯。佢血糖低呀，冇有怕!
唔知大家有冇見識過呢D咁「甜甜蜜蜜」既，類似花生糖加香蕉糕，外層碌咗芝麻既物體呢?甜度比我地食開既花生糖勁D，唔係嗜甜既，千奇咪制呀！
舊野冇影低添，冇相睇lu。