包餃子

星期六，趁住吉之島感謝日，梗係要去巡下。一早打算星期日入元朗，所以都費事去十蚊店果便睇啦。今次主打超市，買咗袋烏冬、兩包切片年糕、菠菜麵、雞脾菰、有機蛋、日本白蛋（唔知好唔好味，買黎試下）。加埋事先係圖書館借果三本書，今次冇馬仔，要自己一個抬晒都幾係。

弊！今晚約咗個大肚朋友包餃子架(為免佢操勞，所有材料梗係我包辦啦)，仲wet咗咁耐添。好彩我昨晚已經買咗材料，返到屋企，抖一陣就開工切材料啦。打算包幾款餃子，所以預備咗黃芽白、木耳、冬菰、粟米、蝦乾、韭菜（大肚婆冇得食）、豬腩肉等等。想整埋南瓜、蠶豆架，不過冇乜時間，算啦。爸爸話唔參加喎，佢情願食飯，咁我又慳返唔駛預備素餃既材料，已經算快啦。

係威係勢，切完木耳、冬菰、粟米、蝦乾，就走去影咗幅相，執埋ｄ野就行過幾座，去人地度啦。我有帶相機架，仲諗住一陣係人地屋企先影相添，點知包完，食埋先記得冇影相呀！可能好多網友都試過好似我咁，明明有ｄ野可以影低俾大家睇既，但就成日都冇影到，冇貨交。雖然仲有十零只未煮既餃子既，但已經冇心機再影啦。

今次我地又煮餃子，又煎餃子，始終都係煎好食ｄ。