韓國食品節 + 自家烏冬

吉之島韓國食品節又黎啦！放工梗係要去掃下貨至得。

買咗一堆小食同餅餅，其實一心想話買薯仔麵架，早兩年食都係十六個幾一包，上年已經要廿零蚊啦，今年居然要卅幾蚊！貴咗咁多，唔買！

上面包小吃蜜糖螺絲粉比較特別, 但未開, 估唔到紅色果盒餅餅咁好味. 比我之前食開既日本貨好d. 拍得住白色戀人.

果罐喉糖都幾好, 似利口樂, 糙米薏仁茶係i:dc買既, 唔駛去到淘大咁遠咯. 粟米仔Bibi用咗黎炒飯, 溫室蕃茄佢仲未煮.

爸爸堅持要買呢d多士仔, 仲話俾買蒜蓉, 洋蔥味, 但Bibi就想趕絕爸爸, 要晒蒜蓉, 洋蔥味, 咁我就做好做醜, 當一人一包, 要咗兩包牛油味啦.

順手買咗兩件衫俾爸爸，又執幾件配合Bibi新校服裙既吊帶底衫，仲買埋個五層不鏽鋼單柄煲添！(個煲煮起黎, 熱到不得了, 除咗手柄唔熱之外, 連煲蓋都熱到飛起)

購物完畢都肚仔餓啦，我地去咗呢間「自家烏冬」食，等咗幾個字先到我地。
係門口櫥窗可以見到佢地點切烏冬。

餐牌好簡單，其實冇咩選擇。

我既蕃茄雞肉湯烏冬, 雞肉有d鞋, 碗就大, 烏冬得少少

爸爸既野菜天婦羅湯烏冬

Bibi既炸蝦野菜餅湯烏冬加一杯蘋果汁。呢個野菜餅好大堆頭，要三個人合力先砌得晒呀。

埋單$109，冇加一。

店員尚算親切, 服務俾個B佢啦! 會唔會返兜? 唔會啦, 不外如是唧. 拎住不零蚊, 可以有更好選擇.

又擦一餐Cafe One

生日翌日, 又食一次lunch buffet, 又去咗呢間啦.

我呢, 淨掛住食, 唔記得影相, 呢d係Bibi影既, 佢仲專登擺靚d, 呢碟係cold cut同沙律

諗住食少少茶樓點心既, 點知打開d蒸籠, 唔係包就係珍珠雞同小籠包之類重手野, 後尾先見到有燒賣, 整粒先, 夾咗兩塊乳豬, d皮好靭, 唔得, 反而咖哩魚同煎魚都ok喎.

魚生比較新鮮, 食咗六件三文魚同一件八爪魚

忌廉蘑菰雞湯同粟米蟹肉羮, 個羮太杰, Bibi夾咗少少麵食

仲要咗碗生滾粥

佢只係要咗少少羮, 好似人地飲淨係碗底咁少.

我都食咗一隻蒸扇貝, 一件白切雞, 一件燒鴨, 一d菜, 亦都要咗一碗粥, 仲淥咗d菜同菰添.甜品我都係比較欣賞佢既朱古力慕司同芒果慕司, 當然啦, 唔整返兩杯H字頭既雪糕就對自己唔住啦!

呢兩碟都係眼訓哥哥既

Bibi既: 佢都食咗好多甜品, 但冇食雪糕

呢碟就係我既.

雖然我地冇食早餐, 只係食咗兩塊餅, 仲由十二點食到兩點半, 但今次未算係好努力.

生日禮物

28/8, 一早就收到Vikki寄黎既串珠壽桃啦, 真係好意頭啦.

呢束係Mabel送俾我既花花, 有繡球, 桔梗, 玫瑰同....我唔曉既襯花

師奶送我既禮物呀

我檢查過, 係手縫既包包

衫夾仔

耳環配件, 唔知點搞既呢, 要好好地坐低研究下先

到咗影Mable果d啦, 相機冇電添! 點呢? 想呃下部機, 搓下d電, 再入返, 佢都係唔多啋我, 試咗好多次都唔得添! 又隔一陣, 再試下, 好似得得地喎, 黎唔切擺post啦, 影埋呢幅, 真係再影唔到啦. 有佢親手做既環保袋同埋幾包果茶, 佢梗係想我飲得杯落啦!

多謝大家既賞賜啊!

赤丸烏冬

生日既下午已經食得飽飽啦, 又有蛋糕食, 夜晚佢地話去赤丸食, 就啱晒啦, 可以食得輕ken D.

Bibi叫咗滑蛋吉列豬扒湯烏冬, 認真麻麻, 有d過咸, 吉豬冇另上, 腍晒, 唔好食.

我同爸爸就一人一碗淨烏冬, 反而呢個正喎.

叫咗一份雜錦關東煮, 原來Bibi想要既年糕袋係冇既, 要加八蚊先得一舊, 其餘既關東煮都腍得滯, 唔好味.淨得果碌蘿蔔好味架咋......

呢餐$108, 真係麻麻. 好彩我唔肚餓唧.

生日飯@銀座藏人

今日同Mabel, 師奶同埋Pri一齊食飯, 今次去佢地冇去過既銀座藏人, 事關果度算抵食又多選擇. 佢地睇黎睇去, 都拿不定主意, 尤其係師奶同Pri, 一時要想要呢款, 一時又話想要果款, 到落單果一刻都仲改變主意.

Mabel點既Sukiyaki, 大堆頭啊.

師奶的冷烏冬, 天婦羅, 三件壽司, 睇落去幾多野食! 梗係啦, Momo都要食架麻.

Pri既八件壽司加湯烏冬, 呢盆野拎到黎, 都幾令佢興奮.

我既豬頸肉拉麵及三件壽司, 拉麵始終都係正d既, 而壽司呢, 我都係第一次食, 比較細件, 好啱嘴型!

原來佢地仲預備埋蛋糕既添! 真係細心啦, 好彩我冇叫重手野唧, 仲可以食返件. 呢個係東海堂既忌廉芝士蛋糕呀.

雖然只係匆匆一個食晏時間, 都覺得佢地好錫我, 真係開心呀~~~~~~!

生日卡

自從開始寫網誌以來，認識了不少網友。竟然得到大家的關顧，送我生日卡呢！

這是瑩瑩給我的，怎麼今次不給我奉上香吻啊！

看到這個style，猜到是誰做的嗎？

呵呵！又鈕又貼貼，當然是小黑咪啦！連信封都呼應架．

謝謝你們啊！

每日約了網友吃午飯，晚上Bibi放棄了中五同學的BBQ陪我，明天又和契媽吃自助餐，節目已經很豐富了！

素食菜餚包

家姐係美食節買咗幾款素食包俾爸爸，實在太正啦！
我初時以為好似其他素食包咁，味道假假地。但呢個品牌就唔同，口感預咗唔似肉，但味道就十分好，將黃豆既味道帶至極致。
我最先試既係素雞翼(一包有六只)，爸爸有理冇理，當佢腸仔咁佢切開一截截，用黎炒青瓜同鮮蘑菰。我抱住懷疑既態度挾一塊黎食，咦！真係好唔同喎！腍腍地，又幾好味喎。

第二次就試呢款素肉排，打開錫紙包裝，乜一片片咁薄既？點叫肉排呀？原來辣辣地架，有黑椒係裏面, 仲有d筍片添，如果佢叫素回窩肉，就更貼切啦！今次既配搭就係蜜糖豆、鮮蘑菰啦。連d汁都好好味，我地冇打獻，但我地食完飯，爸爸就倒起d汁，佢話唔好晒, 留返黎撈麵喎。

呢款素肉排, 我地仲未試, 唔知辣唔辣既呢?

呢包素火腿都唔太差, 睇落有d金華火腿feel, 食落就好似有少少菰菌既質感, 冇一般素火腿咁油, 爸爸用黎炒咗椰菜, 仲好騎呢咁掉咗幾粒車厘茄去煮添.

Bibi就用過佢黎炒飯, 效果都ok. 但以我個人食素食既口味黎講, 呢款就比較遜色啦, 應該唔會encoure架啦.

我上網睇過, 佢地又真係出咗幾多食物架喎!

http://www.chefood.com/product.php

唔知香港邊度有得賣呢?