太陽計畫畢業禮

原本諗住爸爸已經出席過會考放榜打氣大會，今次畢業禮我地係冇得去既。臨到昨日都仍然係話冇我地份既，於是我就約人放工去行街街啦。

點知到咗夜晚十一點零，竟然接到電話話可以俾到兩張飛我地。咁就去啦！放工即刻碌去搭地鐵，去到都未夠兩點。係港台大堂見到擺晒摺椅，可能因為外面太熱，俾ｄ家長留係室內冷氣間冇咁熱掛。係前面擺咗大電視，唔通又好似放榜打氣大會咁，ｄ家長淨係外面睇電視？事但啦，我地搵咗最後一排黎坐。坐到兩點，有工作人員報告話節目會大概係兩點半開始，請大家稍為等候。

之後，有學員唱名，請各組的家長代表出來，入現場就坐。我地聽住一對對家長行出去，當時我地心想：唔，梗係一早已經講好咗架啦。點知，講到Bibi果組既時候，我地聽到個女仔講：請第十三組Bibi既爹地、媽咪。

咦！乜我地都有份既？好野！有得入去！

會上，除咗大家合唱畢業歌、一齊睇返呢十個星期既種種片段之外，少不免有學員及家長的心聲分享環節。講到激動處，學員都有點哽咽，大家不禁動容。

原來今日係麥Sir既結婚紀念日，搞笑既佢，發言時話：呢個計畫係打算做十年既，今年已經係第八年啦，已經累積咗成千個學員。我仔細老婆嫩，如果第日大家肯每人每個月捐廿蚊俾我，都唔錯啦，起碼都可以幫補下我ｄ仔女既教育費吖。咦咁又係喎，真係一個幾唔錯既退休計畫喎！

到致送紀念品俾副局長時，佢話：我都希望我兩個囡囡第日大個咗都可以參加到呢個計畫，等麥Sir教下佢地。咁呢兩個俏嬌娃家陣幾歲呢？分別係一歲同四歲既！爭ｄ笑死我地。

畢業禮完咗，我地影咗幾幅相就走啦，最衰新相機係Bibi度，我地冇得用，所以相片質素認真麻麻。坐小巴再轉地鐵去淘大下午茶，我點咗碗叻沙米線（$22），原本下午茶係包飲品既，但我見今日係清補涼冬瓜湯，又點可以唔加$4要埋個中湯呢。

爸爸就貪心啦，佢要咗個悠樂湯河（$28），又放棄咗個飲品走去加中湯（$4），又加春卷（$12），認真豐富。

食完真係攬住個肚，事關飲咗好多湯落肚。今晚只豬仔仲有Gradnight餘慶，睇怕都會好夜返架啦。