一早起身，為Bibi煮早餐，護送佢返學．聽ｄ家長講要俾多ｄ＄佢地袋係身，又話必要時要交咩留位費，諸如此類，嚇得我不敢怠慢，都俾定成千蚊佢袋住先．
去到校門，好似家長都可以入學校喎．我都想入去八下，但爸爸一味催我同佢食咗早餐先．咁好啦，係間茶餐廳度坐低，叫咗食物，睇見新聞報告已經有個名校十優生接緊成績啦，我諗Bibi間學校都應該差唔多開始派彩啦掛．
其實我冇乜胃口，個胃好似有少少痛，憂心掛．食食下碟鮑魚火腿絲通粉，接到呢隻豬仔喊晒既電話：媽咪～～～，我考到廿六分呀！中文，英文有五星同五呀．
連我都有ｄ激動：咁你快ｄ打俾叔叔啦，睇下修邊科好啦．
好感恩，有得留低，即係唔駛四維撲，免去咗不少麻煩同擔心．
其實我心裏面都好矛盾，好驚塞翁得馬，焉知非禍．原校理科所定既三科選科都係AL（冇AS讀），而且三款組合都唔係咁適合Bibi．三個選擇：物理，化學，生物；物理，化學，純數；物理，純數，應用數學．
首兩個組合，避唔開致命既化學．第三個選擇要讀兩科數，而Bibi一向轉數不高，數學可算係佢既弱項，縱使佢今次考數學同附加數分別都有A同B，但佢真係花咗好大既努力先得返黎既．
可惜呢隻懵豬仔，到依家都仲未有咩明確目標，又冇強項，亦未立到咩大志．Bibi深知若揀選第三選擇，佢就要比以前更留心／小心，更努力去操數．佢話：情願做數做到嘔，都唔想背誦背到嘔喎．綜合各方師長既意見，呢隻諗野慢十拍既懵豬，就挑起佢人生最大既挑戰，踏入數學世界啦．
我唔知日後會點，見步行步啦，都會問下人係邊度補純數好既．希望佢將勤補拙，順利過度啦．
係等候期間，除咗同其他家長交流一下之外，我就係度狂發短訊，通知ｄ姨媽姑姐啦，順便影下佢地學校既壁報板．佢地有四個社：分別係藍社，綠社
Bibi所屬既紅社，黃社
輔導組壁報上的Q版老師畫像，雖然我少去佢學校，唔多認得ｄ老師既樣，但似乎都有似曾相識既感覺．
外面雖然天氣情況不穩定，但都唔算差，註冊之後，我地就走去買咗三條校服裙．Bibi問：點解唔係買五條既？
喂！中六，中七加埋好似得果年半咋喎，唔買咁多啦．
去到先知我地今日冇黎錯呀，一來唔係高峰期，二來天氣唔好，得我地一個客，可以講係五個員工姨姨招呼我地一個客．話咁快就拎咗ｄ校服裙出黎，幫我地車埋校章，搞掂！
為咗支持下佢，爸爸竟然自願係Bibi訓晏覺既時候，幫佢熨晒ｄ校服裙喎！
沒有留言:
張貼留言