牛B肚仔痛

今日一早，都唔算早啦，九點幾先叫Bibi起身。佢昨晚又好夜先返(都過晒十二點咯, 咁係咪叫好早返呢?)，我都想佢訓多一陣。跟住整咗包小雲吞加菜心兩份食，叫佢做住功課先，十一點零鐘去牛B屋企，等A-Maths叔叔同佢傾下升中六選科既問題。

連爵士舞都唔得閒去跳啦，兩點又要出到去彩排司儀既野。我醒呀，帶埋飯盒過去，諗住如果佢地傾得耐，我就叮埋盒飯俾佢一路食, 一路傾, 食咗飯先走。好匆忙咁食完飯，佢又要碌去搭車啦。

我呢，係叔叔度食咗碗佢煲既瑤柱肉片蠔豉粥，正呀！

牛B今日唔多醒神，琴日打過針黎，夜晚肚仔痛，搞到爸爸、媽媽天光咁滯先有得訓，八點幾又要起身餵奶。反而我去到佢又好乖咁成日訓，只係嘔過一次好澎湃既奶唧。下晝牛B媽媽要出外睇大夫，我就繼續留低做我既忌廉玫瑰，作為蛋糕上既配件。後尾牛B老豆侍候完牛B沐浴更衣，又餵完奶，就走入廚房炒飯俾大家食，雖然咸咗少少，但總算炒得唔錯呀。食完，我地就放牛B老豆去洽一陣啦。我冇走到，陪牛B婆婆傾計。可能我年紀大呀，我地都傾得兩嘴，一路傾到牛B媽媽買埋餸返黎。

哈哈！佢地話叫我唔好走，一齊食飯喎，咁就唔客氣啦，反正返到去都係得一個人。今餐有蒸魚，麻婆豆腐，油菜，鹽焗雞，四個人都食唔晒．

冇帶相機，唯有返到屋企影ｄ忌廉玫瑰俾大家睇下啦．