搖控Bibi肉餅 - 冬菰蒸肉餅

日前在超市買咗一包肉碎, 原本講好咗翌日用來煮瑤柱肉碎粥既, 但呢只懵豬仔梗係冇件事啦, 終於咪冇煲到粥, 煲msn佢就叻!

咁不如留返黎晚餐食啦, 一於整碟冬菰蒸肉餅啦!

通過msn吩咐Bibi點整先, 叫佢浸咗冬菰先, 仲要記住影埋相喎, 但係佢淨記得影原材料, 唔記得影過程. 算啦, 得佢一個, 搞得掂都算佢醒啦.

材料: 豬肉碎, 冬菰

佢第一次做, 梗係要佢整簡易版啦. 做法如下:

1. 浸軟d冬菰, 切粒, 用少少糖撈勻, 再加少少生粉撈勻, 佢竟然問少成點呀? 咁我唯有話兩粒超甜粟咁多既糖, 小半茶匙生粉啦. 其實我想佢學下自己決定份量.

(若然大家時間傖促, 放工先話想黎蒸呢味, 又未浸得切冬菰, 可以在熱水入面放少少糖, 再放冬菰入去, 咁就會好快浸軟架啦)

2.  肉碎就要用鹽, 糖, 生抽先撈好, 再加生粉去撈. 又問我落幾多喎, 四份一茶匙鹽, 其餘既自己決定啦!

3.  跟住將d冬菰加埋入去, 撈勻佢, 係隻碟度放少少油, 搽勻佢, 放d肉餅上去, 咁就蒸得架啦!

我繼續做野, 話咁快唧, 佢已經報告搞掂咯喎, 連相都影埋添!

晚上蒸咗碟肉餅出黎, 味道普通, 都有七十分既, 唔多夠咸. 但Bibi已經覺得佢好好食啦. 佢話蒸肉餅仲易過炒飯, 而且佢都幾欣賞自己既廚藝, 咁第日俾多d機會你自己玩下啦. 拿! 莫講話第日你同男朋友仔有啖好食吖, 就算日後住宿舍, 同室友都叫做有啖好食吖麻.

當然啦, 想碟肉餅好食, 冬菰既份量要稍為多d, 依家呢碟就唔夠多啦, 要見到多d冬菰至得. 想碟野香d咩, 係肉餅入面撈少少麻油去蒸就更好, 若然有埋蝦乾呀, 大地魚粉呀, 馬蹄呀就更妙啦.

咁Bibi都係入門唧, 咪搞到咁複雜至得架, 所以我只係叫佢整簡易版, 等佢輕輕鬆鬆咁完成, 增強自信, 我再講下其他補充資料, 咁佢下次想整好味d咯喎, 都知點去搞吖麻.