Bibi炒飯

終於都完晒同學會既活動, 得返一個星期暑假放, 梗係要把握時機, 要Bibi親身上陣實戰一下啦. 為咗令佢一定成功, 又要夠簡單, 又要領略到烹飪既變化, 所以入門最好就係炒飯. 事關豐儉由人, 只要有薑係屋企, 就算得鹽同豉油, 都可以炒到香噴噴既飯出黎既.

爸爸開工, 但又話想返屋企食, 就等陳小姐親自下廚煮俾爸爸食啦. 今次既材料係素火腿粒, 青椒粒, 薑米, 蛋, 咁冷飯就當然唔少得啦.

仲有我地親手剝既超甜粟, 要先用水煮半分鐘既, 隔水備用

用少少油起鑊, 先爆青椒及素火腿, 鏟起備用. 再用少少油爆薑米, 放少少鹽, 加飯, 兜炒至飯熱; 推開d飯, 等鑊中間有個窿, 打只蛋入去, 過幾秒先兜d飯上去, 推散只蛋, 咁就會見到有少少蛋塊架啦; 加埋d粟米, 青椒, 火腿, 再炒下; 呢個時候可以試下味, 唔夠咸就再放少少鹽, 因為素火腿都夠惹味架啦, 唔加生抽吊味都得.

上碟之後就係咁款架啦, 爸爸好感動, 佢都係第一次食Bibi炒既飯咋.

咁梗係多練習, 先會學得快架啦, 事不宜遲, 又要呢隻豬仔整另一款炒飯.

一d用刀技巧同安全知識一定要佢親身做先會吸收到既, 好似切薑米咁簡單, 少用刀既人, 連點去避免切親手都唔曉架. 上面果d材料就我切既, 下面呢d就係Bibi切架啦.

呢款炒飯材料就更簡單, 只係用咗直布羅陀腸, 薑米, 蛋同粟米唧.

超甜粟要先用水煮半分鐘既, 隔水備用

用少少油爆薑米, 順手掉埋d腸腸入去, 兜幾下, 加飯, 灑少少鹽, 炒到飯熱, 加粟米, 又係推個窿, 加蛋, 炒勻佢; 再推開個窿, 贊少少生抽, 兜勻, 試味ok, 就可以上碟啦.

一人一碟唔駛爭, 咁下次就唔再炒飯啦, 又教佢學另一d煮餸入門啦.