上星期日，爸爸開特更。見Bibi難得一日唔駛返同學會，就徵用爸爸部車，一於去拜下山先。
Bibi十一點至一點要跳舞，返到黎，沖個涼都成點九啦，都係食咗飯先啦。
難得一家三口可以一齊去呢度食，平日唔係我同爸爸兩老黎，就係爸爸夜晚接咗Bibi放同學會，兩個去掙檯腳。今次我地三個都叫咗呢款日式曼如飯，係呀，呢間鋪係主張環保飲食既，所以係冇動物成份既野做材料既，連同餐牌，都唔用動物既字眼，好堅持既。
今日既餐湯有ｄ特別，竟然係紅蘿蔔苦瓜湯！可能想同大家清下熱，消下暑啦。飲落唔苦既，連ｄ湯渣都冇甘味，Bibi都可以接受。咁好味既野，我地真係一粒飯都食清架，連Bibi都唔會晒野既。
我影緊呢個餐盤既時候,Bibi係度飲緊水,佢問點解唔等埋佢只杯, 影埋佢連杯水都飲清喎.
食完，原本只係想去爺爺嫲嫲既墓前裝著香，報告Bibi順利升中六既事。但見到餐牌上有春卷，果度ｄ炸野都唔錯架，咪買黎拜嫲嫲咯。佢地係用紙袋紙兜裝外賣既，仲有一盒仔醋同兩片生菜拌吃。冇影相呀，係呢ｄ地方影相，好似唔係幾尊重咁。
之後，原本係打道回府既，但見有車，不如就去置樂果便買少少野啦。初時Bibi唔肯落車架，情願係車度涼住冷氣等我。但我諗住買少少餸，又要買廁紙，都係要佢落車陪我(冇馬仔拎野點得呀?)。
依家ｄ廁紙真係好貴，潔柔都要廿八個半一條。但經消委會提點後，我開始唔多信超市，我依家買既，雖然都唔平，但有十二卷，而且係冇取巧，除開大概廿三蚊條，但品質唔差，亦都唔係紙筒作大果款黎，十分墜手。
買埋紫色糯米粟（用黎煲雜豆湯或者加入飯度一齊煮口感唔錯架）、蕃茄、薯仔，鬼咁重。Bibi就話想食竹炭包，買咗兩包，仲要埋木糠布甸添！佢話晚上唔食飯,食呢d算咯喎.
返上車，呢只豬攬住兩袋包同木糠布甸，忍唔住話：「好彩有跟媽咪落車咋！」
沒有留言:
張貼留言