簡易版素西炒飯

爸爸前一晚煮多咗飯，Bibi又返同學會，我一於炒埋d飯兩老食啦。

雪櫃就冇乜啱佢食既野，有紅椒、黃椒、蛋、菜心。

咁都炒得既，但我係一個超懶既人，又係用懶人法去處理。

切d薑米先；將d燈籠椒同菜心切粒粒。

用少少油起鑊，放少少鹽，加薑米兜幾下；放埋燈籠椒粒、菜心粒又兜下（唔駛炒熟架）。

將打鬆咗既飯倒埋入去，再加少少鹽，炒到ｄ飯熱（即散開又有少少跳起），又挖個窿，打蛋入去。快手兜勻，一路炒到ｄ蛋比較散同均勻，ｄ色已經好靚。

嗞ｄ茄汁入去（就算喜歡茄汁，都唔可以放太多，太濕就唔靚架啦），兜勻，炒到乾乾地就掂晒。

雖然冇乜油水，都唔會好難食既，我知係冇乜材料架啦，我專登唔放素雞丁既，一字講晒：懶！切埋炒埋，食得都唔駛十分鐘，方便快捷

你地知道麻，上面成鑊飯，都只係放咗半只黃椒，半只紅椒，兩只蛋，一條菜心莖咋！就算用晒有機蛋同菜蔬, 都係十蚊咁上下架咋, 有益又健康!