今日刮大風, 行出街, 個頭吹到阿媽都唔認得, 又係一個下雨天, 兩次約佢都落雨既, 呢隻梗係貴人豬黎!
佢每一次都好乖咁食飯架, 雖然佢今日冇食晒d飯, 但都食得好企理, 睇下檯面幾乾淨! 不過咁, 佢果條有埋個兜既圍裙功不可沒, 有咩要跌都裝住晒. 但係我都檢查過, 只係得好少飯飯跌咗入去唧. 放心啦, 有清楚獎架啦.
我地今日揀咗萬宜大廈既銀座藏人, 好似改革咗喎, 見餐牌轉晒日式食品.
原本想食豬頸肉拉麵 + 三舊壽司既, 但見到呢set豬頸肉拉麵 + 迷你魚生飯
好似仲開心d咁喎, 於是咪轉軚咯,
呢碗拉麵既質感唔錯, 仲有好多菰片做配菜, 熱度都OK, 但要記住第一時間好毀滅佢啦, 麵浸得耐唔好食架!
呢個就係迷你魚生飯 + 前菜 (茄子)
瑩瑩媽就要咗彩虹魚生飯 + 拉麵 + 前菜(茄子) (大家要留意, 兜茄子同魚竹飯既比例, 就知呢碗飯係大dd既)
我地飲日本茶, 瑩瑩就有私家特飲 - 開胃消滯既穀芽麥芽
其實今次除咗見下面之外, 係多謝佢地認購咗我做既迷你蛋糕既, 謹代表兒童癌病基金既受惠小朋友多謝你呀! 我會連同早前其他人訂製印仔同迷你蛋糕所收返黎既款項一併捐出去既.
因為上菜超快, 所以十二點八都食晒d野啦. 食完飯飯, 走人, 但一日都係我, 整鬼佢, 同佢媽咪講拜拜, 仲兩個大人作勢走鬼咗去添! 一見到唔對路, 呢隻豬仔即刻僕係椅背度喊喊.
為免影響其他食客, 我地旋即帶佢走, 一出到去, 我指住呢個陳列櫃係度嘩嘩聲, 佢即刻唔記得咗自己頭先點解要喊!
始終都係開心BB黎, 即刻就笑返啦!
其實你不知幾咁乖, 我地點捨得你喊吖. 經過玩具豬B城, 佢話要入入. 我地就同佢係門口櫥窗同d小熊維尼影張相, 跟住叫佢同Pooh Pooh拜拜, 話下次先再入過, 咁佢又乖乖跟我地走.
係啦, 呢個係乜東東呢?
原來打開係手工雕成既肥皂花
呢個係開心小象散子包
仲有椰子糖添!
全部都係佢地一家三口去旅行時帶返黎既手信呀! 多謝晒!
我知道瑩瑩爸成日都要出門公幹, 兩父女為免相思之苦, 都會用視像通訊既, 就醒佢一樣秘密武器, 等下次爸爸出門既時候, 由瑩瑩送俾爸爸, 等佢捱都捱得心甘命抵先!
今次係士多啤梨雲石紋忌廉蛋糕, 配長柄士多啤梨(乜唔係長柄士多啤梨呀? 睇真d啦, 呢d超大粒架!), 加上70%黑朱古力作裝飾, 再配一塊心意牌"Love brings our hearts together!" 瑩瑩爸仲唔 LUM 到暈?
沒有留言:
張貼留言