今日，Bibi終於都考完最後一科Oral，中學會考順利完成，總算放下心頭大石，我們又去了滾滾紅茶吃晚飯。
餐牌又轉了一點，早前消失了的紅燒豆腐煲，竟然在二人餐中出現，即刻決定點一個二人餐。我們選了麻香小黃瓜（比單用醋醃的好吃）
滷水豬耳（暖暖的，又軟又入味）
香葉三杯雞（平日常吃, 今天有點失水準，除了多了點香葉外，不及平日的好味）
紅燒豆腐煲（素食之選）
及兩杯熱豆漿。
因為有三個人，所以另點了一客紅燒豆腐魚柳煲（雖不及第一次吃時驚喜，但仍不錯）加熱台式奶茶。
近日，侍應好像多了一些新面孔(可能是暑期工)，服務態度良好、積極。好像我今次點了兩款豆腐菜式，他竟會回過頭來提醒我點了兩樣豆腐煲菜式，看看我會否改變主意。多體貼啊！
豆漿、奶茶是每回必喝的飲品，可惜每次奶茶的水準都有偏差，並不是次次都能滿意呢。今晚，可能我運氣不差，是１００分的呢！
當然啦，為免浪費，我每次都把吃不完的餸菜帶走，回家又再加點金菰、蔬菜甚麼的，炒了新竹米粉做明日的午餐。
Bibi昨晚成十二點先返，做唔成灰姑娘啦。我等佢，所以大家都好夜先訓。今早，當然一張開眼就日上三竿啦。
吃過有機牛油塗麵包，我就要進行特別任務啦。今日既任務係 -- 嚇Lolo！
事緣爸爸以前曾經收服咗一隻馬騮精 -- Lolo，佢係呀婆屋企好曳，又唔乖乖地訓，又要食夜奶(仲係一晚幾枝果種)，又鍾意半夜喊，搞到家無寧日。爸爸偶爾會湊佢黎住幾日，等佢乖d。呢個小朋友係我度住既時候，又真係好乖好守規矩既，唔會搞野，食粥又食得快，我地次次湊佢黎都煮定有機粥俾佢食，每日佢都依時依候訓覺，仲唔會半夜醒添，一覺訓到天光。連沖涼都唔會搞搞震(Lolo媽話佢驚花灑既, 但係我屋企都係沖花灑架咋)，真係講出黎，佢成家人都唔信呀。
自從Lolo既Daddy返咗香港一家團聚之後，都仲係好曳，成日扭計，所以今日爸爸專登去美樂花園接Lolo一家幾口上車，當時好大雨(連個天都幫我地製造特效呀)，我地係車度同佢訓話。點知呢個幾歲大人仔，居然話唔識爸爸呀！
最終，我地就要佢同爸爸、媽媽同家姐講拜拜，然後就賴低佢係車度。當時我一路要拍低佢既行為變化，又要顧住佢既安全。佢居然立野掟我地呀，我仲俾佢用爪（係爪，佢有指甲）Wee咗一下，鬼咁痛。佢當然大喊啦，仲話：「我唔鍾意May姨叔叔！我唔鍾意May姨叔叔！」（係呀，佢一路都係叫爸爸做「May姨叔叔」既）。
之後，又係一輪誓劈願，話會乖，會聽話，我地就車返佢返屋企啦。睇黎今次都止得下咳一輪掛！
跟手，我就去大埔農墟啦。沿途鬼咁大雨，去到又冇乜雨咯喎。爸爸話要食有機蕃薯，可以連皮食，佢話係車度食唔駛搣皮，方便ｄ咁話．呢度三只細既，成為$22．
佢話豆角方便煮，淥麵又得, 炒又得, 炒蛋又得, 咁好啦，又整札十皮．呢只矮瓜都係十蚊，最特別既，係我地買到加拿大種既秋葵（$15一札，買兩札就$25），原來呢種可以生食，做沙律都得．綠色既就唔可以生食啦，會澀澀地．看檔既阿叔仲話秋葵同魚肉就最夾，用黎釀魚肉就一流．我一上車，即刻用紙巾抹一條黎試下，真係幾好食喎！唔澀，完全冇草青味, 亦唔覺滑潺潺，正呀！
又買咗包有機花生，又倒咗ｄ俾爸爸係車度食．
一路落住雨，褲腳都濕晒，想話走架啦，又俾我見到有公平貿易既薑糖賣喎，都幾正，又整包．
見到有椰糖，咩黎既呢？唔係我地係東南亞食品店見果ｄ椰糖喎，係由人爬上樹，係椰子花採返來既花蜜，再由呢ｄ蜜糖製成既椰糖．比普通糖香好多，亦幾好味(我就咁拎黎食過)，冇椰子味既．細細包都要六十蚊．
想話去埋新生農舍買鹽架，但約咗Mabel兩點幾下午茶，咁就要快ｄ返去啦．
放低晒ｄ野，又執埋ｄ酒塞，去到市中心都兩點咯．係圖書館睇住書等Mabel電話，三點相會，去甘味食野．
佢叫咗免治雞肉釜飯
我就食照燒雞扒湯烏冬
食完去吉之島行下，又撞到網友Sally，如果唔係認得佢老公，我都唔會見到佢．當時我係度諗，好唔好同佢相認呢？最終都係有打個招呼既．
返屋企果陣，又係大雨到痴線，返到去都唔駛五點．Bibi話佢冇食到午餐，所以我即刻煮粥，六點幾就食得啦．一路睇人鬼情未了，一路食粥，睇完都未夠八點半．
今日收到流星寄黎既禮物！噢！唔駛拆lu，個信封爆咗！好彩裏面d野冇跌到出黎唧。
返屋企再試, 啊! 條帶咁長, 原來就咁單手打結都得架!
不如，又俾大家睇下我既成長記錄啦。
今次，我走去研究新課題：黃金粘土
呢款物料好粘紙，但又好似好快乾咁，比較難控制。一慢下手來，又好似會乾裂咁，製作出來的成品，瑕疵太多，亦比較粗糙。
前晚一把開包粘土，見佢粘實ｄ包庄紙，就知大鑊。硬著頭皮，取用少少，試下，我都唔算手腳慢架啦，連搓幼條既時間都唔夠，未去到我想要既幼度，已經開始乾硬。
初步做出黎既野，唉～！真係見到都．．．
老實講，網友裏面，得兩個人見過佢地既衰樣既唧。（我知佢地唔會笑我既！）
昨晚，又再試下，唔努力過，點知得唔得呢？唔試驗下，又點知行唔行得通呢？呢一回，我試下混ｄ其他粘土入去。
這就是我的學習雛型，黃金碗筷（後面銀色的是針）。熟悉黃金土的同好，請多多提點，指教一下，睇下有咩竅門，可以將呢種物料handle得更好。
玩咗幾個月印仔，叫做小學畢業啦。
趁住暑假，都應該研究下第二個課題啦。
終於的起心肝，將雕印仔既東東執拾一下，收納好佢先。
唔執都唔知，原來買下、買下，都搞咗好多野出黎。淨係木仔咋，都唔止裝滿一個壽桃牌金庄禮盒呀。加埋十多塊未雕既橡皮、熱風槍、雕咗既印仔（雖然大家見過既都十成九俾咗人，但有好多未出過鏡既，仲係盒盒度）、紙頭、印台、凸字粉、包庄袋仔等等。仲有各項資料搜集呢, 環保牛油紙 ...自己D鬼畫符等等.
保守估計，就算以我咁慳家，都係呢方面投資咗過千。乜咁多啦咩？真係唔多覺喎。
如果唔執起ｄ野，一來冇空間玩第樣，二來開壇作法又會分心。
早前已經忍痛買咗二百幾個大洋既粘土，如果唔發下功，又得個擺字。好對唔住兩年前買果舊透明土呀，咁耐都未開封，都唔知仲用唔用得。
我都知自己係懶架啦，實在又冇乜動力推到自己去動手。牛B老豆個父親節蛋糕都係Mabel果日ong我先做出黎架咋。
PG家長指引
驚蟲蟲既小朋友，咪睇落去咯喎！
阿一可算是係爸爸既嚴密監控下長大既，自細嬌生慣養，食既係我地自己接枝，新鮮長出來既既嫩葉。爸爸又驚佢揀飲擇食唔夠營養，走去遠d既地方搵綠d既桑葉俾佢轉下口味。
可能成批卵都係虧既，所以先只得一條阿一養到，其餘既蛋都仲係冇厘聲氣。
10日大
期間，因為應承咗同事有蠶蠶就俾佢地養，為免令大家失望，爸爸又走去雀仔街再買d返黎，俾佢地頂下癮先。點知d同事全軍覆沒，我地就仲養到。呢個馬後砲爸爸呢又係度做保長啦：「俾d大條既蠶蠶佢地養都搞成咁啦，俾蟻蠶佢地，仲駛旨意養得生既？哼！全部都係我辛辛苦苦養出黎既，唔俾啦！」(想俾都冇啦，一只蛋都孵唔出。)
11日大，佢已經開始變樣
我地用咗新技術，就係加咗個放大鏡係相機前面，你地睇下幾清楚！
連尾仔ｄ毛毛都見到呀！
終於，爸爸又走去問孵開蠶蠶既專家。據講，蛋生咗出黎之後，要用四十五度高溫既水燙一下，晾返乾佢，先會孵到既。
嗄？唔係啦掛？係咪真架？咁人地講得，梗有佢既道理既，咁爸爸就將新果d蠶蠶生出黎既蛋蛋，分一批出黎做實驗，對照一下啦。
過咗兩日，形勢好似唔錯喎，d蛋比起阿一果d細佬妹蛋蛋係深色好多既。唔通真係咁先孵到？（最後，過咗兩星期，實驗係失敗咗既！呀叔話：天氣太熱啦，已經孵唔到架啦！等爸爸仲慌死佢地凍親，我地開冷氣，佢仲用燈暖住ｄ蛋．）
期間，阿一不斷長大，亦蛻咗幾次皮。都應該變五齡蟲架啦，點解仲未變既？有日，爸爸覺得佢唔多食野，又唔見佢學人吐絲喎，但係佢又照做呢套指定動作喎，唔通？佢係唔識吐絲既？點算呢？
爸爸又有屎橋，就係俾阿一爸爸媽媽用過既蠶繭佢住下，睇下佢滿唔滿意。點解係爸爸媽媽既？因為要兩個蠶繭套埋先可以併到一個完整既家居吖麻。
於是，阿一就係咁入住咗呢間祖屋啦。阿一，同大家say Hi啦！
新技術影到咁近鏡, 真係會嚇死d姐姐呀你!
我真係鄧阿一煩呀！爸爸日日都打開個蠶繭，睇下阿一有冇變身。
真係奇，阿一真係日日都唔同樣，佢仲係個繭入面再蛻多次皮添！
原來佢仲退緊最後一次皮
塊舊皮退到尾，大家睇到嗎？連個頭都唔同晒呀！（呢個係肚果面）
背面
跟住阿一就蛹化咗啦，真係神奇呀！有冇見過蠶蠶唔吐絲都變到蛹架？我地就親眼見過啦。
如果大家未睇過爸爸其餘既搞鬼野, 可以重溫爸爸的童年回憶 - 要PG家長指引先好睇及其他爸爸多野搞既網誌.
P.S. 如果有常識科老師需要呢ｄ圖片既話，歡迎留言問爸爸借相，佢會好樂意同小朋友分享佢既童年樂趣既！
還是李純恩講得好：「香港的母語教學是『偽』母語教學。」根本學生平日講的和課本上所寫的是兩碼子事宜，所以基本學生的中文水平多未達標。
看看對岸台灣，雖未至於字字珠璣、出口成章。但文化氛圍足，普遍學生以至作者的中文水平皆比港人強。
今次，為大家介紹一位年輕作者，熱愛文學的李冠蓉。這本「第一口沙西米」（索書號：427.07 4034），寫作重點不在食物，而是藉食物，傳遞一種令人回味的感覺，在在顯示作者在寫作上的穩紮根基，是中學生用來學習寄物抒情寫作手法的最佳藍本。
書中有一個有趣的小知識，簡述如下：
「披薩製作準則」有以下幾點：
披薩必須是圓的，麵糰要勻稱地揉開，餅皮直徑不超過36cm，正中央厚度不超過0.25cm，其餘部分厚度不能超過2cm，質地必須柔軟、有彈性、容易摺疊，必須使用規定的麵粉、酵母、蕃茄和橄欖油，不能用電烤箱、必須在傳統木製、溫度可高達485℃的灶內烘烤。
乎合上述準則的義大利餐廳，會有特別標籤(可惜圖樣欠奉)，證明他們做出來的披薩才是義大利正宗傳統美食。
因為此書可不輕便，我沒有帶到車上看，只是每天翻翻，終於看完。書末，看到了這幅相片及圖片說明：「這本書獻給我媽媽，相信我沒有長成令她失望的大人。」噢！這正正是每一個做母親對兒女的寄望啊！
仲記唔記得我11/6果晚同d網友見面呀? 其實果日我仲收到呢包東東架!
原來拆開黎，裏面有好多款乾果架！由上而下，由左至右，分別係黑提乾，紅梅乾，金提（你地話有冇搞錯，好似腰果咁大粒），腰果，合桃，杏仁，葵花子，南瓜子，杞子，松子，特別適合注重健康同埋食素人士，所以啱晒爸爸啦！
爸爸一見到有新貨，即刻立走另外一包已經開封既合桃肉，話：你都有新野啦，呢包等我開工果陣補充下啦！
老實講吖，係灣仔柯布連道呢間正隆行既零食真係正架，靚過上環果間好多，一食就知分別，可能灣仔流量較快掛？我第一次食既係人地請我食既鳥結糖，真係又香又好味，仲好過ABC餅屋既出品．
上面第二幅相內果堆東東, 就係我星期日既晚餐啦! 食咗, 真係都唔覺肚餓, 咁就算架啦!
父親節就到啦！冇諗過送野俾爸爸呀，反正都係對牛彈琴既。佢上星期日仲傻下傻下話Bibi：「你做咩唔同我講『父親節快樂』呀？」
喂！老友，下星期先係喎！仲要死撐：「預祝唔得架咩？」
事但啦，反正冇晒公公、婆婆、爺爺、嫲嫲之後，我地都冇話點慶祝架啦。
不過，今年有少少特別，就係幫我捱義氣，頂咗年幾同Bibi補A-Maths既叔叔做咗見習老豆，咁係佢第一個父親節咯喎，就整返個蛋糕贈下佢慶啦！
牛B老豆，祝你父親節快樂，牛B聽教聽話，健康成長。
原本係諗住整芒果漿蛋糕既，為咗令ｄ芒果漿有自然流出黎既效果，吹到我斷氣。上面有奇異果片、開邊士多啤梨、奶油拖肥波板糖、哈蜜瓜球、車厘子圈等等。
整到Bibi補完Oral返黎，佢話：「整薄ｄ個底，就係一個pizza啦。你睇下，ｄ士多啤梨幾似蕃茄呀，仲有芝士添喎！」
淨砌呢個蛋糕，都搞咗成晚，仲未計做配件既時間呢！朱古力片都要做成八、九層，先有咁既效果架。所以我咁懶，唔做蛋糕出黎就係咁解啦。
星期六跟媽打到過這兒吃午餐，覺得價錢便宜，尤其是下午茶時段，翌日趁探過牛Ｂ後，就帶Bibi到這兒下午茶．
門外只有幾名客人在等位，但陸續見到有好幾桌的客人已結帳離開．取檯號碼輪到41，而我們的號數是44．
眼見有幾張卡位桌子已經騰出來，連食具都已備妥，還不見有人帶門外的客人入內，奇！等了一會，我問侍應：請問有位子未呢？
答案：還未有．
我們不需要等迴轉位喎！可以坐卡位的（其實我們已經想好要吃什麼的了，不吃壽司也成）．但對方仍未引路．好不容易被安置到二人迴轉位．
檯上的杯子內有綠茶包，下午茶飲品要加＄，午餐反而不用
我們點了雞肉串（$6），叉燒拉麵（$19），吉列豬扒細飯（$16），及在迴轉帶取了這碟有六件的三文魚小卷（茶市均一價$6）．(原本不打算拍照, 所以吃了三件)
等了老半天都未見有日本芥末醬，原來有很多吃得忘形的客人，取用後沒有放回迴轉帶上．桌上豉油用光了，就走到另一張桌上拿走人家的豉油，但不會用完就放回原位或把吉瓶放在吉桌上等工作人員添補．
我的叉燒拉麵，開動了才記得拍給大家看(日式叉燒很乾硬)
反而這碗飯有點瞄頭，請別誤會，蛋及蟹柳是我由湯麵裏夾出來給Bibi的，但以十六塊來計，比起吉野家好得多了！
想不到這就叫雞肉串，迷你啊！蠶豆一樣大顆啊，差點以為是雞軟骨呢！算啦，街邊魚蛋都要五塊一串啦！
最奇的，是我看見鄰桌有客人投訴說，叫了人結帳，但等了許久也未有人為他們服務．而男侍則信口回應，因為有很多人結帳，所以要排隊．我看見他們自行計算總數，打算帳單一來，即立即放低錢走人．
我眼見勢色不對，就在Bibi還有幾口飯未吃完時叫人結帳，但見男侍回應: 好! 稍等! 接著他便走開, 我們一路用目光追蹤他, 原來他是不會有任何跟進的....
好, 再找另一位女侍, 她立即取起桌上的落單紙, 拿到收銀處取單. 我順道計一計價錢，16+19+6+6應該是$47，但侍應來單時郤說是$48，反正我早預備付$48，立即放下錢離開！
結論係：我情願多付些＄，午餐時段來光顧，也不要再在下午茶時段來了！
