印仔五十四 - 人物造型 I

諗住停一排，轉做另一項手作。但慣性地，吃完晚飯，坐近工作檯，就會隨手執起橡皮章來雕。唉~，要搣甩呢鋪癮都唔係咁易。或者全因我個人懶，攤開一檯工具就唔願執。

因為做粘土手作所要既空間同用具都唔同，要開壇作法咯喎，就要全部物件大轉移至得。而且，因為仲未夠信心，同埋對新項目沒有足夠既認知，所以都仲未開工住。實在需要一盞指路明燈啊，唔通又要兜大圈去搵答案？

今次，拎起一件畫咗N咁耐既橡皮。係呀，我成日都會整定一件件放係度，拎起手就有得玩架啦。咁我都唔怕老實同大家講，剛起草既時候，我係冇能力去雕既，但依家都叫做有信心做到啦。

第一稿，已經急不及待印黎睇下。

尚有少少瑕疵，會修修佢既，但費事晒墨再印啦，都唔算太差唧。只要個完成品靚過依家個樣咪算咯，就算人地再印出黎，只會話：「咦？靚咗既？」咁都唔算貨不對版吖。