今晚，Bibi又去咗太陽計劃既領袖訓練，又係得返我一個。
原本昨晚我地商量過係預備煮乾瑤柱肉碎粥既，但係呢隻豬仔十成九趕得滯啦（點半要返學校練英文口試，三點半又要返到港台排舞、練手語，之後又要上堂），冇浸到米同乾瑤柱。
個大頭蝦爸爸又走去開咗洗衣機洗衫，唔記得晾衫就走咗去開工，去到交更地點先記得打俾我。
爸爸：有啖砂糖同一啖kee，你想聽咩先吖？
我：你有咩砂糖吖，咁聽kee先啦！
爸爸：就係呢，我洗咗衫未晾，咁你一陣放工返到去記住晾咯喎。
我：（好彩都唔算好keng唧）咁咩係砂糖吖？
爸爸：砂糖呢．．．都唔係好算砂糖既（我夠知啦）。就係呢，我幫你鋸咗ｄ木啦，ｄ邊就麻麻，所以都唔係好算係砂糖。
我：嗄！容乜易慘手架，咁你咪用沙紙同我磨返滑佢咯。
爸爸：咁就要麻煩你自己磨啦，或者用介刀或者鉸剪批下佢都應該得架啦。
我：咩話，我梗係唔收貨啦，要我自己磨喎，好易整親手架麻。（我聽過唔知邊個網友講，磨到手好痛既。）都係等你幫我整啦，鬼叫你話自己鋸得好靚呀，又係你講既。
爸爸：我以為你鋸少少既之麻，點知你要我鋸晒ｄ木唧？都係因為要鋸木，搞到我抹地都抹咗幾個字呀，所以先唔記得晾衫咋。
我：ｄ木又係你拎俾我既，係你叫我間好晒ｄ線俾你鋸架喎，依家你賴貓呀？
就係咁，返到屋企我就見到呢堆木係地上。
仲以為可以同ｄ印仔加手柄， 咁我就可以小學畢業啦，點知仲係未得。
咁冇浸到瑤柱同米，就唯有改餐單啦。一於簡簡單單用粟米、磨菰片、肉碎加埋ｄ蕃茄磚煮長通粉啦。
呢頭煲緊水，我果頭就走去醃肉。水滾落咗通粉（費事唔拖唔水，成包落晒），再滾起就收火。焗緊ｄ通粉既時候我就去冰格拎ｄ粟米粒去洗，又開罐磨菰。跟手ｄ通粉都可以過冷河啦。有板有眼，幾個字就煮好一大鑊醬汁長通粉啦，份量仲夠留埋我地兩母女明日既午餐添！
沒有留言:
張貼留言