Sweet Sweet的感覺 XV - 父親節蛋糕

父親節就到啦！冇諗過送野俾爸爸呀，反正都係對牛彈琴既。佢上星期日仲傻下傻下話Bibi：「你做咩唔同我講『父親節快樂』呀？」
喂！老友，下星期先係喎！仲要死撐：「預祝唔得架咩？」
事但啦，反正冇晒公公、婆婆、爺爺、嫲嫲之後，我地都冇話點慶祝架啦。
不過，今年有少少特別，就係幫我捱義氣，頂咗年幾同Bibi補A-Maths既叔叔做咗見習老豆，咁係佢第一個父親節咯喎，就整返個蛋糕贈下佢慶啦！
牛B老豆，祝你父親節快樂，牛B聽教聽話，健康成長。
原本係諗住整芒果漿蛋糕既，為咗令ｄ芒果漿有自然流出黎既效果，吹到我斷氣。上面有奇異果片、開邊士多啤梨、奶油拖肥波板糖、哈蜜瓜球、車厘子圈等等。

整到Bibi補完Oral返黎，佢話：「整薄ｄ個底，就係一個pizza啦。你睇下，ｄ士多啤梨幾似蕃茄呀，仲有芝士添喎！」

衰得佢吖，我都知ｄ色水唔夠豐富既，仲係度諗緊點去改善。
終於都俾我諗到啦，就係同佢加返d朱古力片啦！不過，好mum水，唔係好夠材料，ｄ朱古力片要自然，又要夠薄，手頭合適既片片唔多，因為唔可以用人工剪出黎，係要一早片佢果陣已經形成咁既形狀先可以用，一生硬，就唔似樣架啦。全堆朱古力片出動，都係爭少少，所以唯有放一兩件人工版係後面，搏大家唔覺。

粘好咗之後既效果，都算滿意，起碼似返個蛋糕啦。

淨砌呢個蛋糕，都搞咗成晚，仲未計做配件既時間呢！朱古力片都要做成八、九層，先有咁既效果架。所以我咁懶，唔做蛋糕出黎就係咁解啦。