今日都幾開心，專登放半日假，十二點去銅鑼灣柏寧酒店Cafe One食自助餐．
母親節Bibi仲考緊會考，今次算係食餐好既！
湯就例牌有兩款，中式既係粟米雞蓉羮，西式係蕃茄忌廉湯，我地四個人，二對二，兩款湯都有人捧場
沙律既材料認真多，當然唔能夠樣樣食啦，算係非常好
冷盆既海鮮有小龍蝦，青口，蝦，魚生同壽司，我咁懶，梗冇食果ｄ要落手落腳架啦
煙三文魚，煎魚柳，燒豬肉，泰式咖哩魚柳．．
炒蟶子no good，菜好正，焗三文魚腩麻麻，燒味有好多款，我只係夾咗燒鴨唧，點心亦都有好幾款，但我淨夾咗蝦餃，其實仲有好多冷盆同熱盆既，但我冇要到．
車仔麵就梗有啦，都冇乜位食啦，粥我就食咗兩次，因為好夠熱，我鍾意食熱野，碟花生係Bibi拎黎自己食既
甜品比較大件，我都冇乜拎到，驚晒野呀．所以只係拎咗呢少少，士多啤梨慕司，朱古力蛋糕，朱古力慕司同埋點可以唔食既雪糕呢
Bibi仲係小朋友，梗係要玩朱古力噴泉先安樂架啦．
至於另一位參賽者咯喎，佢就一早就回本啦！
有自助軟雪糕食添架，Bibi話ｄ士多啤梨醬好好味，所以西瓜都搞成咁，你有冇食過士多啤梨醬同花奶加係西瓜同菠蘿度食吖？我腸胃弱，真係唔敢咁試呀．
食完之後，我仲要同Bibi去買謝師宴要著既衫．先係銅鑼灣行咗一陣，冇咩啱，跟住去旺角搵．我呢個路盲，鬼識路咩？明明去到旺角站，個出口話係旺角中心既，但一出到去，嗄？新之城？事但啦，照入去巡下，都睇啱咗一件既，但又想睇下有冇另一年好ｄ既，走咗上樓上幾層行下．
最後都係想去返頭先果間買，落返去，咦？唔見既？搵唔到喎，又盪失路？
Bibi：不如落去最地下果層再上返黎啦！
咦，又好喎，因為間野就係扶手梯一上到第三層就見架啦．好！就落去地下果層啦．
落到去，咁邪既！乜變咗旺角中心既？咁點呀？乜我地唔係行緊新之城既咩？咁點算呀？
Bibi：我地去返地鐵站，再黎過！
就係咁，兩傻就係盲中中咁由地鐵再上返地面，入返新之城，終於都搵返間鋪，買咗果件hom衫啦！
我都話咗我係路盲黎架啦，但我俾人問路既頻率就係相當高既，真係唔知ｄ遊客搞邊科架．
沒有留言:
張貼留言