朱古力

老闆先排去完俄羅斯，買咗d朱古力返黎，由左至右分別係咖啡朱古力、70%黑朱古力同埋蛋白脆朱古力。三款都偏甜，但既然係手信，大家都開開心心咁照食，一人食d，唔覺既！

而我自己，間中都會買下朱古力黎食既。公平貿易既70%可可朱古力係一個好選擇，但略貴。比較食得過既，就係1848既產品，76%都ok架啦，85%就更好！呢款就比較滑溜。

當然啦，冬天時先有既松露朱古力就仲正，試過有人大熱天時係外國帶一盒返黎俾我，到我手變咗一袋朱古力漿lu！唯有雪返硬佢，再切開一舊舊，用錫紙包返，同Bibi兩份，一次食一舊啦。

Citysuper裏面既Royce專門店既朱古力都好好味，尤其喜歡限量版既士多啤梨朱古力，每一粒都係幸福既滋味呀！有一年我就係收過一盒咁既聖誕禮物，一家三口，每次係雪櫃拎出黎，一人一粒，可以食到幾日啦！好味既野，係要嗒真d先得既！少吃多滋味啊!